ឆ្នាំ ២០២១ កម្ពុជាប្រមូលចំណូលពន្ធអាករបានក្នុងទឹកប្រាក់ជាង $២,៧ ពាន់លាន
ភ្នំពេញ៖ ក្នុងឆ្នាំ ២០២១ ការប្រមូលចំណូលពន្ធអាកររបស់អគ្គនាយកដ្ឋានពន្ធដារ (GDT) សម្រេចបានក្នុងទឹកប្រាក់ជាង ២,៧ ពាន់លានដុល្លារ កើនលើសផែនការប្រចាំឆ្នាំជាង ២៤ ភាគរយ។ នេះបើយោងតាមសេចក្តីប្រកាសព័ត៌មានរបស់ GDT ស្តីពីកិច្ចប្រជុំបូកសរុបលទ្ធផលការងារប្រមូលចំណូលពន្ធ ប្រចាំឆ្នាំ ២០២១។
សេចក្តីប្រកាសព័ត៌មានឱ្យដឹងថា ទោះបីជាស្ថិតក្នុងស្ថានភាពដែលសេដ្ឋកិច្ចសកល ក៏ដូចជាសេដ្ឋកិច្ចកម្ពុជានៅមិនទាន់មានភាពប្រាកដប្រជា ជាពិសេសក្នុងបរិការណ៍នៃការទទួលរងផលប៉ះពាល់ធ្ងន់ធ្ងរពីការរីករាលដាលជំងឺកូវីដ ១៩ និងរលកនៃការរីករាលដាល និងវីរុសបំប្លែងថ្មីឥតឈប់ឈរនៃកូវីដ ១៩ ក៏ការប្រមូលពន្ធអាកររបស់អគ្គនាយកដ្ឋានពន្ធដារ នៅតែរក្សាបាននូវកំណើនគួរឱ្យកត់សម្គាល់។ ជាក់ស្តែងចាប់ពីខែមករាដល់ដំណាច់ខែធ្នូ ឆ្នាំ ២០២១ ចំណូលពន្ធអាករ ដែល GDT ប្រមូលបានមានចំនួន ២ ៧៨១,៩២ លានដុល្លារ ធៀបទៅនឹងផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២១ ដែលតម្រូវឱ្យប្រមូលឱ្យបាន ២ ២៤៣,០៧ លានដុល្លារ ឃើញថាកើនលើសផែនការ ២៤,០២ ភាគរយស្មើនឹងប្រាក់ប្រមាណ ៥៣៨,៨៥ លានដុល្លារ។
ដោយឡែកចំណូលពន្ធអាករប្រចាំខែធ្នូ ឆ្នាំ ២០២១ មានចំនួន ២២១,៦៨ លានដុល្លារ ស្មើ ៩,៨៨ ភាគរយនៃផែនការច្បាប់ហិរញ្ញវត្ថុសម្រាប់ការគ្រប់គ្រង ឆ្នាំ ២០២១។
អគ្គនាយកនៃអគ្គនាយកដ្ឋានពន្ធដារ លោក គង់ វិបុល បាននិយាយថា លទ្ធផលជាទីមោទនៈនេះ គឺមិនអាចកាត់ផ្តាច់ចេញពីការដាក់ចេញនូវយុទ្ធសាស្ត្រថ្មីៗជាបន្តបន្ទាប់របស់រដ្ឋាភិបាលកម្ពុជាក្នុងការគ្រប់គ្រងស្ថានការណ៍នៃការឆ្លងរាលដាលកូវីដ ១៩ ប្រកបដោយប្រសិទ្ធភាពខ្ពស់តាមរយៈការចាក់វ៉ាក់សាំងប្រឆាំងនឹងជំងឺកូវីដ ១៩ ប្រកបដោយស្មារតីបុរេសកម្ម និងទាន់ពេលវេលា ដែលអាចកសាងភាពស៊ាំក្នុងសហគមន៍ទៅនឹងជំងឺរាតត្បាត និងឈានទៅបើកប្រទេសជាតិឱ្យដំណើរការ សេដ្ឋកិច្ចសង្គមឡើងវិញកាលពីខែវិច្ឆិកា ឆ្នាំ ២០២១ បានឡើយ។
លោកបន្ថែមទៀតថា ភាពវិជ្ជមានទាំងអស់នេះក៏ដោយសារ GDT បានដាក់ឱ្យអនុវត្តនូវប្រព័ន្ធបច្ចេកវិទ្យាថ្មីៗមួយចំនួន ដើម្បីបង្កភាពងាយស្រួលដល់អ្នកជាប់កាតព្វកិច្ចបង់ពន្ធផងដែរ ដែលមានដូចជាដាក់ឱ្យអនុវត្តប្រព័ន្ធគ្រប់គ្រងការដាក់លិខិតប្រកាសពន្ធលើប្រាក់ចំណូលតាមអនឡាញ, ការដាក់ឱ្យប្រើប្រាស់ប្រព័ន្ធបញ្ជូនឯកសារអេឡិចត្រូនិក ,ការដាក់ឱ្យប្រើប្រាស់នូវកម្មវិធីសម្រាប់ប្រកាស និងបង់ពន្ធលើអចលនទ្រព្យ និងពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទតាមអនឡាញ, ការអនុញ្ញាតឱ្យចុះបញ្ជីពន្ធដារតាមថ្នាលបច្ចេកវិទ្យាព័ត៌មាន, និងការដាក់ឱ្យអនុវត្តយន្តការដំឡើងឧបករណ៍វាស់ចំណុះ ស្រាបៀរ និងភេសជ្ជៈគ្មានជាតិសុរារបស់សហគ្រាសផលិតនៅក្នុងស្រុក ដែលជាការពង្រឹងអនុលោមភាព និងតម្លាភាពក្នុងការបង់ពន្ធ, និងការដាក់ឱ្យប្រើប្រាស់ប្រព័ន្ធស្នើសុំលិខិតបញ្ជាក់ និងវិញ្ញាបនបត្រពន្ធដារនានាតាមអនឡាញជាដើម៕
