ឈុត សេរីវ៉ាន់ថង ប្តេជ្ញាយកឈ្នះសេក ចៅជូត ដើម្បីប្រជែងរកកៅអីទៅកាន់វគ្គបន្ត
ភ្នំពេញ៖ ការប្រកួតជម្រុះសន្សំពិន្ទុលើកទី២ ដើម្បីបានឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រ ដណ្តើមពានមាស ក្នុងព្រឹត្តិការណ៍អធិរាជគុនខ្មែរ ISI PIPE ISI PALM ឈុត សេរីវ៉ាន់ថង បានធ្វើការប្តេជ្ញាចិត្តថា នឹងប្រឹងប្រែងឱ្យអស់ពីសមត្ថភាព យកឈ្នះសេក ចៅជូត ខណៈ អេលីត ចំរើន ត្រូវប្រជែង វ៉ាន់ វឿន ដើម្បីប្រជែងរកកៅអីទៅកាន់វគ្គបន្ត។
ឈុត សេរីវ៉ាន់ថង បានអោយដឹងថា «ក្បាច់ដែលគួរឱ្យចាប់អារម្មណ៍របស់ សេក ចៅជូត គឺគាត់ពូកែទាត់លើ និងកែង ហើយខ្ញុំក៏មានការបារម្ភទៅលើស្នៀតនេះដែរ ប៉ុន្តែខ្ញុំប្តេជ្ញាថា នឹងខិតខំប្រឹងប្រែប្រកួតឱ្យបាន ៣ ពិន្ទុបន្ថែមទៀត ព្រោះអីវាជាវគ្គសំខាន់ ដែលខ្ញុំត្រូវឡើងទៅវគ្គពាក់កណ្តាលផ្តាច់ព្រ័ត្រ។ ខ្ញុំនឹងខិតខំហ្វឹកហាត់ឱ្យអស់ពីកម្លាំងកាយកម្លាំងចិត្ត ដើម្បីសម្រេចឱ្យបាន ចំពោះការយក៣ពិន្ទុបន្ថែមលើនេះ»។
ចំណែកជំនូបរវាងជើងខ្លាំង អេលីត ចំរើន និងអ្នកលេងកាំភ្លើងខ្លី វ៉ាន់ វឿន វាបានក្លាយជាការប្រកួតដ៏ក្តៅគគុក ដើម្បីរកអ្នកដែលត្រូវខ្ទាតចេញពីការប្រកួតដណ្តើមពានមាសនេះ មុនគេ ព្រោះទាំង វ៉ាន់ វឿន និង អេលីត ចំរើន សុទ្ធតែបានជួប ការខកចិត្ត នៅក្នុងការប្រកួតបើកឆាកដូចគ្នា។
អេលីត ចំរើន បាននិយាយថា៖ «ខ្ញុំមានការសោកស្តាយ ដែលបានខកខានការប្រកួតបើកឆាក តែធ្វើម៉េចបែរយើងឈឺ គឺទោះឡើងប្រកួត ក៏គង់តែនៅចាញ់គេដដែល អ៊ីចឹងយើងសុខចិត្តអត់វ៉ៃតែម្តង ចំណែកការប្រកួតលើកនេះ ប្រហែលជាពិបាក និងមានភាពតានតឹង។ ថ្វីបើខ្ញុំធ្លាប់ឈ្នះគាត់ទាំង ៣ លើក សម្រាប់ការជួបគ្នាកន្លងមក ប៉ុន្តែ វ៉ាន់ វឿន ឥឡូវគាត់ខំហ្វឹកហាត់ខ្លាំង»។
អេលីត ចំរើន បានបញ្ជាក់ថា៖ «របួសជើងរបស់ខ្ញុំ បានជាសះស្បើយ ១០០ ភាគរយហើយ ហើយខ្ញុំក៏បានហ្វឹកហាត់ពេញលេញ បាន ១ សប្តាហ៍ផងដែរ ខណៈការប្រកួតលើកនេះ ខ្ញុំនឹងធ្លាក់១០០ ភាគរយតែម្តង បើសិនជាចាញ់ តែបើឈ្នះ ខ្ញុំអាចមានសង្ឃឹមឡើងទៅវគ្គបន្ត បើសិនជាខ្ញុំ អាចបន្តឈ្នះការប្រកួតលើកចុងក្រោយ ហេតុនេះសម្រាប់ការប្រកួតជុំទី២ នេះ ខ្ញុំប្តេជ្ញាធ្វើម៉េចយកឈ្នះ»។
នៅមុនការប្រកួតជម្រុះសន្សំពិន្ទុលើកទី២ នៅលើសង្វៀនថោន លើកនេះ ទាំង ឈុត សេរីវ៉ាន់ថង និង សេក ចៅជូត សុទ្ធតែទទួលបាន ៣ ពិន្ទុពេញ សម្រាប់ការប្រកួតបើកឆាករបស់ខ្លួន ខណៈវ៉ាវ់ វឿន ទទួលបា១ពិន្ទុ ចំណែកអេលីត ចំរើន គ្មានពិន្ទុនោះទេ ។ អេលីត ចំរើន នឹងត្រូវធ្លាក់ចេញពីការប្រកួតនេះ ដោយស្វ័យប្រវត្តិតែម្តង បើសិនជារូបគេ ចាញ់ វ៉ាន់ វឿន ក្នុងជំនួបលើកនេះ ប៉ុន្តែបើសិនជារូបគេ ឈ្នះវិញ នោះឱកាសប្រជែងរបស់ ចំរើន ត្រូវអ៊ុតមើល នៅពេលរូបគេ ត្រូវប្រកួតចុងក្រោយជាមួយ ឈុត សេរីវ៉ាន់ថង៕
