លោក ជិន ម៉ាលីន ចាត់ទុករបាយការណ៍ HRW មិនមានអ្វីចម្លែក ហើយធ្វើឡើងក្នុងចេតនានយោបាយ
ភ្នំពេញ៖ បន្ទាប់ពីអង្គការ Human Rights Watch ( HRW )បានចេញផ្សាយរបាយការណ៍របស់ខ្លួន ដោយធ្វើការរិៈគន់ស្ថានភាពសិទ្ធិមនុស្សនៅកម្ពុជាបានបន្តធ្លាក់ចុះធ្ងន់ធ្ងរ ប៉ុន្តែលោក ជិន ម៉ាលីន បានចាត់ទុករបាយការណ៍ ដែលបានចេញផ្សាយសម្រាប់ឆ្នាំ២០២១ ថា មិនមានអ្វីចម្លែក ហើយធ្វើឡើងក្នុងចេតនានយោបាយ ក្នុងន័យគំនុំគួន និងស្អប់ខ្ពើមរាជរដ្ឋាភិបាលកម្ពុជាតែប៉ុណ្ណោះ។
លោក ជិន ម៉ាលីន អ្នកនាំពាក្យគណៈកម្មាធិការសិទ្ធិមនុស្សកម្ពុជា អះអាងថា “អត់មានអីចម្លែកទេ អ្នកណាក៏ដឹងដែរថា Human Rights Watch ធ្វើការរាយការណ៍ រិះគន់រដ្ឋាភិបាលក្នុងចេតនានយោបាយ និងស្អប់ខ្ពើមកន្លងមក ដូច្នេះអត់មានអីចម្លែកនោះទេ”។
លោក ជិន ម៉ាលីន ថា របាយការណ៍នេះ ក៏គ្មានមូលដ្ឋានច្បាស់លាស់ដែរ។ របាយការណ៍នេះអត់មានពិនិត្យទៅលើសកម្មជនទាំងអស់នោះ ធ្វើសកម្មភាពបំពានច្បាប់ដែរ ឬក៏អត់ ហើយសមត្ថកិច្ចមានមូលដ្ឋានអ្វីខ្លះ ដើម្បីធ្វើការចោទប្រកាន់ និងដំណើរការនីតិវិធីតាមផ្លូវតុលាការ ? គេអត់ខ្វល់ទេ ដូច្នេះរបាយការណ៍នេះមិនមានមូលដ្ឋានផ្លូវច្បាប់ច្បាស់លាស់គ្រប់គ្រាន់នោះទេ។
ចំពោះការអនុវត្តច្បាប់ និងវិធានការរបស់រាជរដ្ឋាភិបាល ដើម្បីទប់ស្កាត់ការរីករាលដាលជំងឺកូវីដ១៩ លោក ជិន ម៉ាលីន អះអាងថា ការចោទប្រកាន់នេះ រឹតតែអត់ត្រឹមត្រូវទៀត ហើយមានស្តង់ដារពីរ។ ដោយសារតែប្រទេសប្រជាធិបតេយ្យធំៗគេអនុវត្តតឹងរឹង ធ្ងន់ធ្ងរជាងកម្ពុជាទៅទៀត ហើយគេអនុវត្តន៍អ្វីដូចជាកម្ពុជាដែរ ប៉ុន្តែអង្គការមួយនេះមិនរិះគន់ បែរជាមករិះគន់កម្ពុជាទៅវិញ។ ដូច្នេះបញ្ជាក់ថា របាយការណ៍នេះធ្វើឡើងក្នុងចេតនានយោបាយ និងស្តង់ដារពីរ និងក្នុងគោលដៅមួយបន្តុះបង្អាប់ ក្នុងនៃគំនុំគុំកួន និងស្អប់ខ្ពើមកម្ពុជាប៉ុណ្ណោះ។
កាលពីថ្ងៃ១៣ ខែមករា កន្លងទៅថ្មីៗនេះ អង្គការ H R W បានចេញផ្សាយរបាយការណ៍របស់ខ្លួន ដោយធ្វើការរិៈគន់ស្ថានភាពសិទ្ធិមនុស្សនៅកម្ពុជាបានបន្តធ្លាក់ចុះធ្ងន់ធ្ងរ ដោយសាររដ្ឋាភិបាលបានបង្ក្រាបលើអ្នកនយោបាយប្រឆាំង សកម្មជនសង្គម បរិស្ថាន រួមទាំងបញ្ហានិណ្ឌភាព ការបង្កើតច្បាប់រឹតត្បិតសិទ្ធិមនុស្សជាដើម។ មិនតែប៉ុណ្ណោះ របាយការណ៏ ក៏បានវាយប្រហារធ្ងន់ៗទាក់ទងសកម្មភាព ក៏ដូចជាវិធានការរបស់រាជរដ្ឋាភិបាល ដើម្បីទប់ស្កាត់ការរីករាលដាលជំងឺកូវីដ១៩៕
