ចូលរួមសោកស្តាយ! អតីតតារាចម្រៀងលោក ជា ដេវីត បងប្រុសលោក ជា វណ្ណារិទ្ធ ទទួលមរណៈភាពយប់មិញ

មានការចាប់អារម្មណ៍ជាខ្លាំងដោយយប់មិញនេះ ពិធីករលោក ជា វណ្ណារិទ្ធ បានបង្ហាញរូបភាពជាច្រើនសន្លឹករបស់បងប្រុស គឺលោក ជា ដេវីត ដែលធ្លាប់ជាតារាចម្រៀងម្នាក់បានទទួលមរណៈភាពដោយសារជំងឺកាលពី​យប់មិញនេះ ។

ជាមួយនឹងរូបភាពរបស់បងប្រុសលោក ជា ដេវីត ជាច្រើនសន្លឹក លោក ជា វណ្ណារិទ្ធ បានលើកឡើងថា «ដោយក្តីអាឡោះអាល័យ អាណិតបំផុតចុងឆ្នាំ២០២១ និង ដើមឆ្នាំ ២០២២ គាត់ហូបលែងបាន ទឹកលែងចូល រហូតស្គមរីងរៃ ពេលនេះបងប្រុសខ្ញុំ ដែលបងប្អូនធ្លាប់ស្គាល់ជាអតីតតារាចម្រៀង ជា ដេវីត បានទទួលមរណៈភាពហើយដោយជំងឺ។សូមវិញ្ញាណក្ខន័្ធបងទៅកាន់សុគតិភព ជាតិណាៗ សូមកុំឱ្យ អភ័ព្វដូចជាតិនេះទៀត សូមឱ្យកម្មពា ទាំង​ឡាយរសាយអស់ត្រឹមជាតិនេះចុះ» ។

ការលើកឡើងរបស់លោក ជា វណ្ណារិទ្ធ បានធ្វើឱ្យមិត្តភក្តិនៅក្នុងបណ្តាញសង្គមចូលរួមរំលែកទុក្ខចំពោះការបាត់​បង់​បងប្រុសជាទីស្រឡាញ់របស់លោក ដោយគ្មានថ្ងៃវិលត្រឡប់ ។ ការស្លាប់របស់លោក ជា ដេវីត មិនត្រូវបានលោក ជា វណ្ណារិទ្ធ បញ្ជាក់ថាមានជំងឺអ្វីឡើយ ។ អ្វីដែលគួរឱ្យរំជួលចិត្តនោះលោក ជា ដេវីត ដែលធ្លាប់មានរូបរាងស្រស់សង្ហាបែរជាមានរូបរាងស្គមស្គាំងមើលទៅគួរឱ្យសង្វេគជាខ្លាំង ។

លោក ជា ដេវីត ក៏ធ្លាប់ជាតារាចម្រៀងម្នាក់ដែលតែងលេចមុខនៅតាមឆាកប្រគុំតន្រ្តីនៅតាមស្ថានីយទូរទស្សន៍នានា តែក្រោយមកក៏បាត់មុខលោកតែម្តង មិននឹកស្មានថាលោកមានជំងឺធ្ងន់ធ្ងររហូតដល់បាត់ បង់ជីវិតបែបនេះសោះ ៕