ពិតជាជ្រះថ្លាណាស់! តាមពិតឡានថ្មីខ្ទង់ម៉ឺនដុល្លាររបស់គ្រួសារ គង់ ចាន់ស្រីមុំ ទើបនឹងទិញ គឺទុកប្រគេនដល់ព្រះសង្ឃសោះ
ពិតណាស់មុនដាច់ឆ្នាំ ២០២១ ពោលគឺនៅថ្ងៃទី ២៥ ខែធ្នូ ឆ្នាំ ២០២១ នេះ តារាស្រីហាយសូរ គង់ ចាន់ស្រីមុំ បានធ្វើឱ្យមហាជនហាក់កាន់តែចាប់អារម្មណ៍ពីជីវិតគ្រួសារបែបអភិជនរបស់អ្នកនាងទៀត ក្រោយពីបានឃើញ អ្នកនាង បង្ហាញរថយន្តស៊េរីទំនើបទើបទិញថ្មីសន្លាងមួយគ្រឿងទៀត ពណ៌ក្រហមឆ្អិនឆ្អៅ ដែលមានតម្លៃខ្ទង់ជិត ៤ ម៉ឺនដុល្លារ។
ក្នុងនោះ គ្រាន់តែធ្វើការបង្ហាញរថយន្តថ្មីសន្លាងនេះ មហាជនអ្នកគាំទ្រភាគច្រើនច្បាស់ជាគិតថា អ្នកនាង និងស្វាមី ធ្វើការស្វាមគមន៍សមាជិកថ្មីមួយបន្ថែមទៀតចូលក្នុងគ្រួសារក្នុងឱកាសឆ្នាំថ្មីនេះខាងមុខនេះ ព្រោះតែជារឿងធម្មតាសម្រាប់គ្រួសារហាយសូរមួយនេះ ដែលតែងចាយលុយទិញរថយន្តទំនើបៗជាហូរហែនោះ។
ដោយឡែកមិនដូចអ្វីដែលបានគិតឡើយ គឺរថយន្តថ្មីមួយគ្រឿងនេះ អ្នកនាង គង់ ចាន់ស្រីមុំ និងស្វាមី ចំណាយរាប់ម៉ឺនដុល្លារទិញនេះ មិនមែនជាសម្រាប់ខ្លួនឯងនោះទេ គឺដើម្បីធ្វើការប្រគេនដល់ព្រះសង្ឃមួយព្រះអង្គគង់នៅវត្តព្រៃម្លូ បង្ហាញពីចិត្តជ្រះថ្លារបស់អ្នកទាំងពីរ ក្នុងថ្ងៃគម្រប់ខួបអាពាហ៍ពិពាហ៍។
នេះបើតាមបណ្ដាញសង្គមរបស់ មូលនិធិវត្តព្រៃម្លូ រស់ដោយធម៌ Wat Prey mlou lives by Dharma បានសរសេររៀបរាប់ថា ៖«ថ្ងៃ អាទិត្យ ទី២៦ ខែធ្នូ ឆ្នាំ ២០២១ សូមថ្លែងអំណរគុណដល់លោក គឹម សីហា និង អ្នកស្រី Kong chansreymom ព្រមទាំងបុត្រ (ក្មួយស្រី ម៉ូម៉ូ) បានប្រគេនឡានមួយគ្រឿងដល់ខ្ញុំព្រះករុណាអាត្មាភាព ដែលស្ថិតក្នុងឱកាសគម្រប់ខួបអាពាហ៍ពិពាហ៍ផងដែរ។ ក្នុងឱកាសដ៏ល្អនេះសូមជូនពរឱ្យអ្នកទាំងពីរជួបប្រទះតែសេចក្តីសុខចម្រើនប្រកបការងារអ្វីក៏សូមឱ្យបានសម្រេចបំណងប្រាថ្នា សូមអនុមោទនា!»៕
