Justin Bieber ខំបង្ហោះរូបប្រូម៉ូតខ្សែក តែគ្រប់គ្នាបែរជាចាប់អារម្មណ៍តែ Lisa ក្រុម Blackpink ថតជាប់ក្នុងរូបថតតែមួយ!

អាមេរិក៖ នារយៈពេលថ្មីៗនេះ ប្រិយមិត្តមួយចំនួនប្រាកដជាបានជ្រាបមកហើយ ដែលក្រុមចម្រៀងនារីកំពុងតែមានប្រជាប្រិយភាពខ្លាំង BLACKPINK បានឡើងសម្តែងលើឆាកប្រគំតន្រ្តីប្រចាំឆ្នាំដ៏ធំរបស់អាមេរិក Coachella និងមានឱកាសបានស្និទ្ធស្នាលជាមួយនឹង តារាល្បីៗលំដាប់ពិភពលោកជាច្រើន។

មិនតែប៉ុណ្ណោះ គេសង្កេតឃើញថា សមាជិក៣រូបរបស់ BLACKPINK គឺ Jennie Lisa និង Rose ក៏បានចំណាយពេលចូលរួមកម្សាន្តនៅកម្មវិធីប្រគំតន្រ្តីនេះ ដូចជាមនុស្សទូទៅផងដែរ ដោយគេបានប្រទះឃើញពួកគេ បានដើរលេងយ៉ាងរីករាយជាមួយនឹង ក្រុមតារាហូលីវូដដូចជា Jaden Smith , Justin Beiber, Hailey Beiber តារាល្បីៗជាច្រើនផ្សេងទៀតផង។

ដោយឡែក កាលពីម្សិលមិញនេះផងដែរ តារាចម្រៀងប្រុស Justin Beiber ក៏បានបង្ហោះនូវរូបថតមួយសន្លឹក នៅលើគណនីអ៊ីនស្តារក្រាមផ្ទាល់ខ្លួនរបស់លោក ដែលជារូបថតដើរលេងជុំគ្នា កាលពីកម្មវិធី Coachella។

តួយ៉ាង នៅក្នុងនោះរូបថត យើងសង្កេតឃើញថា Justin ចង់បង្ហាញពីខ្សែកម៉ាក DrewHouse ដែលJaden Smith បានកំពុងតែពាក់ ដែលវាប៊្រេនដែល Justin តែងតែព្យាយាមធ្វើការប្រូម៉ូតផ្សព្វផ្សាយជារៀងរាល់ថ្ងៃ នៅលើអ៊ីនស្តារក្រាមរបស់លោក។

ប៉ុន្តែមិនថាយ៉ាងណា រូបថតមួយនេះដែល Justin បានបង្ហោះ មិនបានធ្វើឲ្យអ្នកគាំទ្រចាប់អារម្មណ៍អ្វីបន្តិចឡើយ ទៅលើខ្សែក តែគ្រប់គ្នាបែរជាចាប់អារម្មណ៍តែពី Lisa និង Jennieក្រុម Blackpink ដែលបានថតជាប់នៅក្នុងរូបថតនោះដែរ។ ហើយComment ស្ទើរតែ៩៥ភាគរយ នៅលើរូបថតមួយនេះ សុទ្ធសឹងតែនិយាយពី Lisa ទាំងអស់។

លើសពីនេះទៅទៀត ថែមទាំងមានអ្នកគាំទ្រមួយចំនួន បានធ្វើការ Comment ប្រាប់ឲ្យ Justin ឲ្យខ្សែកម៉ាក DrewHouse ទៅLisa ពាក់ដើម្បីឲ្យនាងជួយប្រូម៉ូតឲ្យថែមទៀតផង៕