យប់មិញ! ងិន ម៉ារ៉ាឌី ធ្វើឱ្យមហាជនខ្មែរហូរទឹកភ្នែក ពេលឃើញការបង្ហាញឈុតតំណាងជាតិខ្មែរលើឆាក MU
នៅរាត្រីរំលងអធ្រាត្រថ្ងៃទី ១០ ខែធ្នូ ឆ្នាំ ២០២១ ចូលថ្ងៃទី ១១ ខែធ្នូ ឆ្នាំ ២០២១ វេលាម៉ោងប្រមាណ ១២ យប់ ម៉ោងនៅក្នុងប្រទេសកម្ពុជា កម្មវិធី Miss Universe 2021 ក៏បានឈានចូលដល់វគ្គប្រកួតបឋម ដែលជាវគ្គប្រកួតដ៏សំខាន់មួយសម្រាប់ការបង្អួតសម្រស់នៃបវរកញ្ញា ក៏ដូចជាឈុត Evening Gown និង ឈុតតំណាងជាតិ ដែលរចនាយ៉ាងល្អឯក តំណាងប្រទេសនីមួយៗ។
នៅក្នុងរាត្រីផ្សាយផ្ទាល់វគ្គប្រកួតបឋមនេះ គេសង្កេតឃើញថាបើការចាក់ផ្សាយកម្មវិធីយប់ជ្រៅយ៉ាងណា សម្រាប់ប្រជាជនកម្ពុជាក៏ពិតមែន ប៉ុន្តែមហាជនអ្នកគាំទ្រ Miss Universe Cambodia 2021 កញ្ញា ងិន ម៉ារ៉ាឌី គឺមិនអាចអាក់ខាននោះទេ ដោយគេសង្កេតឃើញមានអ្នកលេងបណ្តាញសង្គមហ្វេសប៊ុកជាច្រើនបានរង់ចាំទស្សនាការបង្ហាញវត្តមានដ៏អស្ចារ្យ របស់បវរកញ្ញាតំណាងកម្ពុជាមួយនេះរហូតដល់ជិតភ្លឺទៀតផង។
ជាក់ស្តែង ពីមួយវគ្គទៅមួយវគ្គ នៃការបង្ហាញខ្លួនរបស់កញ្ញា ងិន ម៉ារ៉ាឌី ពិតជាធ្វើឱ្យអ្នកគាំទ្រកម្ពុជារំភើបចិត្តយ៉ាងខ្លាំង ក៏ព្រោះភាពជឿជាក់ សមត្ថភាព ក្នុងការបង្ហាញខ្លួនរបស់ស្ត្រីខ្មែរតូចល្អិតរូបនេះ។ ជាពិសេសនោះ អ្វីដែលកាន់តែអស្ចារ្យ គឺវេលាម៉ោងប្រមាណជា ៣ ទៀបភ្លឺ ពោលគឺវេលានៃការបង្ហាញឈុតតំណាងជាតិ «ប្បការិកាចត្វានិមិត្ត» នោះឯង។
ដំណើរនៃការបង្ហាញនូវឈុតតំណាងជាតិ ដ៏អស្ចារ្យ របស់កញ្ញា ងិន ម៉ារ៉ាឌី បើទោះជាមានបញ្ហាបច្ចេកទេសក្នុងដំណើរនៃការដើររបស់នាងក៏ពិតមែន ប៉ុន្តែ Miss Universe Cambodia 2021 រូបនេះ បានធ្វើឱ្យប្រជាជនកម្ពុជាជាច្រើន បានស្រក់ទឹកភ្នែក ក៏ព្រោះតែការបានបង្ហាញនូវអ្វីដែលជារបស់កម្ពុជា នៅលើឆាកអន្តរជាតិដ៏ធំមួយនោះ។
លើសពីនោះ បើទោះជាកញ្ញា ងិន ម៉ារ៉ាឌី បានបង្ហោះសារសុំទោសនូវកំហុសឆ្គងយ៉ាងណាក្តី ប៉ុន្តែអ្នកគាំទ្រកម្ពុជា នៅតែពេញចិត្តការបង្ហាញសមត្ថភាពរបស់នាងយ៉ាងខ្លាំង ព្រមទាំងសរសើរដល់រូបនាងថែមទៀតផង ដោយនាងជាស្ត្រីខ្មែរដ៏រឹងមាំ ដើម្បីការបង្ហាញអ្វីជារបស់កម្ពុជាក្នុងការប្រកួត៕
