មនុស្សជំនិតរបស់លោក កឹម សុខា៖ បើគ្រាន់តែអ្នកប្រជាធិបតេយ្យដូចគ្នា មិនអាចរកស្មារតីរួបរួមគ្នាបានផង ធ្វើម៉េចអាចបង្រួបបង្រួមសម្លេងឆ្នោត ដើម្បីទទួលជ័យជម្នះបាន!
(ភ្នំពេញ)៖ លោក មុត ចន្ថា មនុស្សជំនិតរបស់លោក កឹម សុខា អតីតប្រធាននៃអតីតគណបក្សសង្រ្គោះជាតិ បានលើកឡើង ថា បើគ្រាន់តែអ្នកប្រជាធិបតេយ្យដូចគ្នា មិនអាចរកស្មារតីរួបរួមគ្នាបានផង ធ្វើម៉េចអាចបង្រួបបង្រួមសម្លេងឆ្នោត ដើម្បីទទួល ជ័យជម្នះបាន!។ ការលើកឡើងនេះ គ្រាដែលអតីតមន្ត្រីជាន់ខ្ពស់ នៃអតីតគណបក្សសង្រ្គោះជាតិ បានចេញទៅបង្កើត គណ បក្សថ្មីៗចំនួន៥ជាបន្តបន្ទាប់។
លោក មុត ចន្ថា បានសរសេរនៅលើគណនីហ្វេសប៊ុករបស់លោកថា សិទ្ធិនយោបាយរបស់អ្នកគ្មាននរណាហាមឃាត់នោះទេ ប៉ុន្តែអ្នកនឹងត្រូវស្តីបន្ទោស និងដាក់ការសង្ស័យអំពីមូលហេតុដែលមិនអាចរួបរួមគ្នាបាន ដោយសារតែៈ ១)អ្នកមិនចង់ឈ្នះ ២)អ្នកចង់បានត្រឹមជាអ្នកកំដរ ៣)អ្នកស្វែងរកលាភសក្ការៈ។
មនុស្សជំនិតរបស់លោក កឹម សុខា រូបនេះ បានសរសេរបន្តថា «ក្នុងករណីនេះ អ្នកមិនអាចអះអាងថា អ្នកបង្កើតគណបក្សដើម្បីស្វែងរកការរក្សានូវតុល្យភាពនយោបាយ និងតុល្យភាពអំណាច សំដៅធានាដល់លំហប្រជាធិបតេយ្យ ការគោរពនិងការការពារសិទ្ធិ-សេរីភាព។ អ្នកអាចនឹងអះអាងថា ការបង្កើតគណបក្សចូលរួមបោះឆ្នោតនៅពេលខាងមុខ ទោះបានកៅតិចតួច ប្រសើរជាងដេកចាំ គំនិតនេះអាចមានហេតុផលខ្លះ ប៉ុន្តែអ្នកនិងបក្សរបស់អ្នកនៅតែចាញ់ដដែល ហើយអ្នកក៏មិនអាចជួយអ្វីដល់ជាតិ ដូចដែលអ្នកអះអាងឡើយ»។
លោកថា សរុបមកវិញ អ្នកនឹងចាញ់ ហើយនិងចាញ់រហូត ដោយសារតែអ្នកមានគំនិតអស្មិមានះ និងអាត្មានិយម។ អ្នកតម្កល់ប្រយោជន៍ផ្ទាល់ខ្លួន និងបក្សរបស់អ្នកខ្ពស់ជាងបំណងប្រាថ្នា និងប្រយោជន៍ជាតិ-ប្រជាពលរដ្ឋជាធំ។
បើតាមលោក មុត ចន្ថា អ្នកមិនអាចឆ្លើយសំណួរមួយចេញទេៈ ហេតុអីអ្នកមិនអាចរួបរួមក្នុងចំណោមអ្នកស្រឡាញ់ប្រជាធិបតេយ្យដូចគ្នាបាន? អ្នកមិនអាចចោទបក្សកាន់អំណាចថា បង្ខិតបង្ខំអ្នកមិនឱ្យរួបរួមគ្នាទេ ព្រោះដោយសារតែអ្នកខ្លួនឯង អស្មិមានះ និង អាត្មានិយម!៕
