Avengers: Endgame កើបលុយកប់ៗ រំពឹងថានឹងរកចំណូលបានជាង ១ពាន់លានដុល្លារក្នុងសប្តាហ៍ដំបូង

បរទេស៖ យោងតាមប្រភពសារព័ត៌មានច្បាស់ការណ៍មួយ បានរាយការណ៍ថា រឿង Avengers: Endgame បានបំបែកកំណត់ត្រាក្នុងប្រវត្តិសាស្រ្តជាលើកដំបូង ដែលអាចរកចំណូលបានជាង ១ពាន់លានដុល្លារអាមេរិក ដោយការបញ្ចាំងនៅក្នុងរោងកុនត្រឹមតែសប្តាហ៍ដំបូងតែប៉ុណ្ណោះ។

ដោយក្នុងនោះ គ្រាន់តែថ្ងៃបើកសម្ពោធជាលើកដំបូង នៅប្រទេសចិនសោះ អាចរកចំណូលបានប្រមាណ ១០៧,៥លានដុល្លារអាមេរិកបាត់ទៅហើយ។

ព្រោះតែមនុស្សម្នាជុំវិញពិភពលោក នាំគ្នាក្វា.កបុកមើលរឿងនេះខ្លាំង ដូច្នេះតាមប្រភពបានសន្និដ្ឋានថា រឿង Avengers: Endgame នឹងអាចរកចំណូលបាន ១,១៤ពាន់លានដុល្លារអាមេរិក ដែលវាគឺជាកំណត់ត្រាពុំធ្លាប់មាននៅក្នុងប្រវត្តិសាស្រ្ត សម្រាប់ការចាក់បញ្ចាំងនៅក្នុងរោងកុនក្នុងសប្តាហ៍ដំបូង ហើយវាក៏ជារឿងដំបូងដែលត្រូវបានរំពឹងទុកថានឹងយកឈ្នះរឿង Avatar និងរឿង Titanic ផងដែរ។

គួររម្លឹកផងដែរថា រឿង Avatar រកចំណូលបានសរុបប្រមាណ ២,៧ពាន់លានដុល្លារ, រឿង Titanic រកបាន២,២ពាន់លានដុល្លារ, រឿង Star Wars: The Force Awakens រកបាន ២,១ពាន់លានដុល្លារ និងរឿង Avengers: Infinity War កាលពីឆ្នាំមុនរកចំណូលបាន ២ពាន់លានដុល្លារ៕