គ្រោះថ្នាក់ចរាចរណ៍រវាងម៉ូតូនិងត្រាក់ទ័រ បណ្តាលឱ្យស្លាប់មនុស្សម្នាក់ និងរបួសធ្ងន់ម្នាក់
(ឧត្តរមានជ័យ)៖ កាលពីវេលាម៉ោង៧យប់ ថ្ងៃទី២៥ខែមេសាឆ្នាំ២០១៩ ស្ថិតនៅផ្លូវជាតិលេខ៥៨ ចន្លោះបង្គោលគីឡូម៉ែត្រលេខ១៥៧.១៥៨ ស្ថិតក្នុងភូមិផ្អុងសង្កាត់កូនក្រៀលក្រុងសំរោង មានគ្រោះថ្នាក់ចរាចរណ៍ មួយកើតឡើងរវាងម៉ូតូនិងត្រាក់ទ័រ បណ្តាលឱ្យស្លាប់មនុស្សម្នាក់ និងរបួសធ្ងន់ម្នាក់ ។
ជនរងគ្រោះមានឈ្មោះឈ្លឿន សីហា ភេទប្រុស អាយុ២២ឆ្នាំ រស់នៅភូមិល្បើក ឃុំស្នួល ស្រុកក្រឡាញ់ ខេត្តសៀមរាប ស្លាប់នៅកន្លែងកើតហេតុ។បានបើកបរម៉ូតូស៊ូមមើអិច ពណ៌ខៀវ ពាក់ស្លាកលេខ បន្ទាយមានជ័យ ១Q-២៣៤២។ ម្នាក់ទៀតឈ្មោះផាក ថា ភេទប្រុស អាយុ ២២ឆ្នាំ រស់នៅភូមិជាមួយគ្នា(អ្នករួមដំណើរ) របួសធ្ងន់។ ឯអ្នកបើកបរត្រាក់ទ័របានជិះរត់គេចខ្លួនបាត់មិនស្គាល់អត្តសញ្ញាណ។
ក្រោយកើតហេតុ ជនរងគ្រោះត្រូវបានកម្លាំងនគរបាលប៉ុស្តិ៍នគរបាលវរៈព្រំដែន៧០២ហៅរថយន្តសង្គ្រោះទៅមន្ទីរពេទ្យ ចំណែកសពត្រូវបានប្រគល់ជូនសាច់ញាតិយកទៅធ្វើបុណ្យតាមប្រពៃណី ៕
អត្ថបទ៖ ដារ៉ា
