ដូចការសង្ស័យមែន តារាចម្រៀង ព្រាប សុវត្ថិ ហក់ចូលក្រុមហ៊ុនកាឡាក់ស៊ីណាវ៉ាត្រា ហើយ!

(សង្គមសិល្បៈ)៖ព័ត៌មានដ៏រសើប មួយ បាន ធ្វើឱ្យ មហាជនមានការភ្ញាក់ផ្អើល ខ្លាំងមែនទែននៅល្ងាចនេះ ក្រោយបាន ដឹងថាកំពូលតារាចម្រៀង ព្រាប សុវត្ថិ គ្រោងនឹងចូលមកក្រុមហ៊ុន កាឡាក់ស៊ីណាវ៉ាត្រាគ្រុប ដូចការសង្ស័យមែន។

នេះបើយោងតាមលិខិតអញ្ជើញរបស់ផលិតកម្ម កាឡាក់ស៊ី ណាវ៉ាត្រា ដែលបានចែកជូនដល់សិល្បករ និងភ្ញៀវកិត្តិយសជាច្រើនដើម្បីជាការអញ្ជើញឱ្យចូលរួមក្នុងកម្មវិធីទទួលស្វាគមន៍កំពូលតារាចម្រៀង ព្រាប សុវត្ថិ មកកាន់ក្រុមហ៊ុនរបស់ខ្លួន ដោយ លិខិត អញ្ជើញ មួយច្បាប់នេះ ត្រូវ បាន ចែក រំលែក នៅ លើ បណ្ដាញ សង្គមហ្វេសប៊ុកលោក Heng Loong នៅមុននេះបន្តិច នាល្ងាចថ្ងៃពុធ ទី១៩ ខែសីហា ឆ្នាំ២០២០នេះ។

នៅក្នុងលិខិតនោះបានសរសេររៀបរាប់យ៉ាងច្បាស់ៗថា «លិខិតអញ្ជើញ! កម្មវិធីទទួលស្វាគមន៍កំពូលតារាចម្រៀង ព្រាប សុវត្ថិ មកកាន់ ក្រុមហ៊ុន កាឡាក់ស៊ី ណាវ៉ាត្រា គ្រុប សូមគោរពអញ្ជើញលោក ហេង ឡុង និងភរិយា»។ តាមលិខិតដដែលនេះដែរ បញ្ជាក់ថា ពិធីទទួលស្វាគមន៍ កំពូលតារាចម្រៀងរូបនេះ នឹងរៀបចំឡើងនៅថ្ងៃទី២៥ សីហា ២០២០ ខាងមុខនេះ ចាប់ពីម៉ោង ៥ និង៣០ នាទី ល្ងាចតទៅ! នៅសណ្ឋាគារ Garden City ជិតវិមានឈ្នះៗទល់មុខស្ថាននីយ៍ទូរទស្សន៍ PNN ព្រែកព្នៅ។

ទោះជាយ៉ាងណាក្ដី សម្រាប់ការស្វាគមន៍តារាចម្រៀង ព្រាប សុវត្ថិ មកកាន់ក្រុមហ៊ុនកាឡាក់ស៊ី ណាវ៉ាត្រា នៅតែមិនទាន់ ច្បាស់ ការ ថា លោកនឹងមកក្នុងនាមជាតារាចម្រៀងនៅក្នុងផលិតកម្មថ្មីនេះ ឬក៏មកក្នុងនាមជាដៃគូ សហការលើការងារជំនួញ ជាមួយថៅ កែ ផលិត កម្មនេះ គឺលោកឧកញ៉ា ឡេង ណាវ៉ាត្រា ដោយហេតុថាពេលនេះខាងក្រុមហ៊ុន កាឡាក់ស៊ី ណាវ៉ាត្រា ពុំទាន់បាន លម្អិត ឱ្យ ច្បាស់ នៅឡើយ ទំនងជានឹងមានការបកស្រាយច្បាស់ៗនៅថ្ងៃប្រារព្ធពិធីទទួលស្វាគមន៍នោះតែម្ដង៕