ប្រជុំបូកសរុបសភាពការណ៍ លទ្ធផលកិច្ចប្រតិបត្តិការ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ និងផ្សព្វផ្សាយអនុសាសន៍របស់អគ្គស្នងការនគរបាលជាតិ
(កំពង់ចាម)៖ នៅព្រឹកថ្ងៃច័ន្ទ ៣រោច ខែចេត្រ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី២២ ខែមេសា ឆ្នាំ២០១៩ នៅសាលប្រជុំធំនៃស្នងការដ្ឋាននគរបាលខេត្តកំពង់ចាម បានបើកកិច្ចប្រជុំបូកសរុបសភាពការណ៍ លទ្ធផលកិច្ចប្រតិបត្តិការក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ និងផ្សព្វផ្សាយអនុសាសន៍ ដឹកនាំរបស់ ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ ។
ពិធីនេះប្រព្រឹត្តទៅ ក្រោមអធិបតីភាព លោកឧត្តមសេនីយ៍ទោ ឯម កុសល ស្នងការនគរបាលខេត្ត ដោយមានការអញ្ជើញចូលរួមពី លោក លោកស្រី ស្នងការរង លោកអនុប្រធានផែនជំនាញ លោក លោកស្រី នាយ នាយរងការិយាល័យជំនាញ លោកនាយផ្នែកនគរបាលបេតិកភ័ណ្ឌ លោកអធិការ អធិការរងនគរបាលស្រុក ក្រុងទាំង១០ លោកនាយប៉ុស្តិ៍នគរបាលទាំង១០៩ សរុបចំនួន ៣៣៩នាក់ ។
ជាកិច្ចចាប់ផ្តើម លោកវរសេនីយ៍ឯក ស៊ូ សុខុម៉ា អនុប្រធានផែនការងារសេនាធិការ បានឡើងអានរបាយការណ៍បូកសរុបសភាពការណ៍ លទ្ធផលកិច្ចប្រតិបត្តិការក្នុងឱកាសបុណ្យចូលឆ្នាំថ្មីប្រពៃណីជាតិខ្មែររយ:ពេល៣ថ្ងៃ និងរយ:ពេល៥ថ្ងៃ ។
ជាបន្តលោកឧត្តមសេនីយ៍ស្នងការបានពាំនាំការផ្តាំផ្ញើនឹងការសាកសួរសុខទុក្ខពី ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ សម្តែងការកោតសរសើរដល់កងកម្លាំងនគរបាលខេត្តកំពង់ចាម ដែលបានប្រឹងប្រែងទាំងយប់ទាំងថ្ងៃក្នុងការជួយថែរក្សា និងបម្រើសេវាជូនដល់ប្រជាពលរដ្ឋក្នុងរយៈពេល៣ថ្ងៃនៃពិធីបុណ្យចូលឆ្នាំខ្មែរប្រពៃណីជាតិ។
ឯកឧត្តមអគ្គស្នងការនគរបាលជាតិ បានមានប្រសាសន៍គូសបញ្ជាក់រំលឹកដល់ប្រសាសន៍របស់សម្តេចនាយករដ្ឋមន្ត្រី ហ៊ុនសែន និងសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ដែលបានកោតសរសើរចំពោះកងកម្លាំងសមត្ថកិច្ច និងអាជ្ញាធរគ្រប់ជាន់ថ្នាក់ដែលបានរួមសហការគ្នាធ្វើឱ្យពិធីបុណ្យចូលឆ្នាំខ្មែរកន្លងមកនេះបានប្រព្រឹត្តទៅដោយរលូន ជោគជ័យ និងធ្វើឱ្យពលរដ្ឋបានសប្បាយរីករាយ ។
ជាចុងក្រោយលោកឧត្តមសេនីយ៍ស្នងការ មានមតិផ្តាំផ្ញើដល់លោកអធិការ អធិការរង លោកនាយប៉ុស្តិ៍ ត្រូវបំពេញភារកិច្ចដែលថ្នាក់លើប្រគល់ជូន ឱ្យបានសម្រេចជោគជ័យ ៕
ប្រភព ៖ អគ្គស្នងការនគបាលជាតិ
ដកស្រង់ដោយ ៖ កាម៉ង់ដូស្មោះស្នេហ៏
