អភិបាលខេត្តប៉ៃលិន ឧបត្ថម្ភគ្រែអ្នកជម្ងឺចំនួន១៥ ដល់មន្ទីរពេទ្យបង្អែកខេត្ត

(ប៉ៃលិន)៖ លោក ផាន់ ចាន់ធុល អភិបាលខេត្តប៉ៃលិន អមដំណើរដោយលោកស្រីអភិបាលរងខេត្ត ព្រមទាំងក្រុមការងារ នាព្រឹកថ្ងៃទី២០ ខែកក្កដា ឆ្នាំ២០២០ បានប្រគល់គ្រែអ្នកជម្ងឺ ចំនួន ១៥ និងភេសជ្ជ ចំនួន ២០កេស ព្រមទាំងថវិកាចំនួន២លានរៀល ដល់មន្ទីរពេទ្យបង្អែកខេត្តប៉ៃលិន ដើម្បីបំពេញនូវសេចក្តីត្រូវការ ក្នុងការផ្តល់សេវ៉ាសុខាភិបាល ជូនប្រជាពលរដ្ឋ ដែលមកទទួលសេវានៅមន្ទីរពេទ្យបង្អែកខេត្តប៉ៃលិន ។

មានប្រសាសន៍លើកឡើងក្នុងពិធីនេះដែរលោក ផាន់ ចាន់ធុល អភិបាលខេត្តប៉ៃលិន បានជំរុញ ដល់ថ្នាក់ដឹកនាំ និងមន្ត្រីសុខាភិបាលទូទាំងខេត្តប៉ៃលិន ត្រូវសហការ ជាមួយគ្រប់អ្នកពាក់ព័ន្ធទាំងអស់ រួមគ្នាចូលរួមលើកកម្ពស់អនាម័យ ដើម្បីអនុវត្តនូវវិធានការប្រយុទ្ធប្រឆាំងនឹងជម្ងឺឆ្លងនានា ជាពិសេសជំងឺឆ្លងកូវីត-១៩ ជាមួយគ្នានេះ ក្រុមគ្រូពេទ្យទាំងអស់ ត្រូវខិតខំបំពេញការងារ ឱ្យបានច្បាស់លាស់ តាមមុខជំនាញរៀងៗខ្លួន ដើម្បីធានានូវការអនុវត្តការផ្តល់សេវាសុខមាលភាព ជូនប្រជាពលរដ្ឋឱ្យបានល្អ ជាពិសេសត្រូវប្រកាន់ភ្ជាប់នូវក្រមសីលធម៌គ្រូពេទ្យ ដោយប្រើឥរិយាបទ ពាក្យសំដី ឱ្យបានសមរម្យជាមួយអ្នកជំងឺ ទើបមានការគាំទ្រ និងកោតសរសើពីប្រជាពលរដ្ឋមកវិញ

លោកអភិបាលខេត្ត ក៍បានកោតសរសើរ ចំពោះក្រុមគ្រូពេទ្យជំនាញ ដែលកន្លងបានខិតខំបំពេញភារកិច្ចរបស់ខ្លួនប្រកបដោយការយកចិត្តទុកដាក់ និងការទទួលខុសត្រូវខ្ពស់ ក្នុងការពិនិត្យតាមដានសុខភាពជូនប្រជាពលរដ្ឋ ព្រមទាំងបានសម្ដែងការលើកទឹកចិត្តខ្ពស់ដល់អាជ្ញាធរមូលដ្ឋាន ដែលបានរួមសហការគ្នាចុះធ្វើការអប់រំផ្សព្វផ្សាយ និងណែនាំបងប្អូនប្រជាពលរដ្ឋដែលមានការសង្ស័យ ឬទើបវិលមកពីក្រៅប្រទេស ឱ្យមកពិនិត្យសុខភាព និងចូលរួមអនុវត្តន៍តាមការណែនាំរបស់ក្រសួងសុខាភិបាល ដើម្បីរួមគ្នាបង្ការ និងទប់ស្កាត់ ការរីករាលដាលនៃជម្ងឺកូវីដ-១៩។

បើតាមរបាយការណ៍របស់ លោកវិជ្ជបណ្ឌិត កឹម សំណាង ប្រធានមន្ទីរពេទ្យបង្អែកខេត្តប៉ៃលិន បានឱ្យដឹងថា៖ គិតត្រឹមថ្ងៃទី២០ ខែកក្កដា ឆ្នាំ២០២០នេះ មន្ទីរពេទ្យបង្អែកខេត្ត មានអ្នកជំងឺ ចំនួន ២៨នាក់ កំពុងសម្រាកព្យាបាលជម្ងឺ ក្នុងនោះផ្នែកសម្ភពចំនួន ១៤នាក់ ផ្នែកសង្គ្រោះបន្ទាន់ចំនួន ០៥នាក់ ផ្នែកវះកាត់ចំនួន ១១នាក់ និងផ្នែកកុមារចំនួន ១១នាក់ផងដែរ៕