កាន់តែធ្ងន់ធ្ងរហើយ! ប្រេស៊ីល រកឃើញករណីកូវីដ១៩ថ្មីដល់ទៅ២ម៉ឺនករណីបន្ថែម
តាមប្រភពព័ត៌មាន CNN បានឱ្យដឹងថា ក្រសួងសុខាភិបាលប្រេស៊ីលបានរាយការណ៍ថា មានករណីឆ្លងថ្មីនៃជំងឺកូវីដ១៩ យ៉ាងតិច ២០,៦៤៧ ករណីកាលពីថ្ងៃច័ន្ទ ដែលធ្វើឱ្យចំនួនឆ្លងសរុបរបស់ប្រទេសនេះ យ៉ាងហោចណាស់មាន ៨៨៨,២៧១ករណី។
យោងតាមក្រសួងសុខាភិបាលប្រទេសប្រេស៊ីល ក៏បានកត់ត្រាការបាត់បង់ជីវិត របស់អ្នកជំងឺកូវីដ១៩ យ៉ាងតិច ៦២៧នាក់ ក្នុងរយៈពេល ២៤ម៉ោងកន្លងមក ដែលធ្វើឱ្យចំនួនអ្នកបាត់បង់ជីវិតសរុបដោយកូវីដ១៩ របស់ប្រទេសនេះ យ៉ាងហោចណាស់មានចំនួន ៤៣,៩៥៩នាក់។
ថ្ងៃច័ន្ទនេះ ក៏ជាថ្ងៃគម្រប់មួយខែដែរ ដែលប្រទេសប្រេស៊ីល គ្មានរដ្ឋមន្ត្រីក្រសួងសុខាភិបាល។ ក្រសួងត្រូវបានដឹកនាំ ដោយឈរលើមូលដ្ឋានបណ្តោះអាសន្ន បន្ទាប់ពីការលាលែងពីតំណែងរបស់លោក Nelson Teich កាលពីថ្ងៃទី១៥ ឧសភា។
ចាប់តាំងពីការលាលែងពីតំណែងរបស់លោក Teich ក្រសួងសុខាភិបាលប្រេស៊ីល ត្រូវបានដឹកនាំដោយលោក Eduardo Pazuello ដែលជាឧត្តមសេនីយ៍ទោកងទ័ព និងជាអតីតលេខាធិការប្រតិបត្តិនៃក្រសួង។ ប្រធានាធិបតីប្រេស៊ីល លោក Jair Bolsonaro បានចុះហត្ថលេខាលើក្រឹត្យមួយដែលធ្វើឱ្យតួនាទីរបស់លោក Pazuello ជារដ្ឋមន្ត្រីបណ្តោះអាសន្ន នៅថ្ងៃទី២ ខែមិថុនា។
ការលាលែងពីតំណែងរបស់លោក Teich នៅក្នុងខែឧសភា គឺជាការចាកចេញជាលើកទី២ របស់រដ្ឋមន្ត្រីសុខាភិបាលប្រេស៊ីល ក្នុងកំឡុងពេលនៃការផ្ទុះឡើងនៃកូវីដ១៩ បន្ទាប់ពីការបណ្តេញលោក Luiz Henrique Mandetta ចេញពីតំណែង កាលពីខែមេសា៕
