ចាប់បានក្មេងទំនើងដែលបង្កហឹង្សាម្នាក់ទៀតហើយមុននេះបន្តិច! តែនៅម្នាក់ទៀតដែលកាន់ដាវកំពុងសំងំនៅខេត្តកណ្តាល

(កំពង់ឆ្នាំង)៖ លោកវរសេនីយ៍ឯក នន ស៊ីណាត អធិការនគរបាលស្រុកកំពង់ត្រឡាច បានឲ្យដឹងតាម ទូរស័ព្ទនៅល្ងាចថ្ងៃទី១៨មេសានេះថា សមត្ថកិច្ចបានចាប់ឃាត់ខ្លួនម្នាក់ទៀតហើយកាលពីវេលាម៉ោង៨ព្រឹក ថ្ងៃទី១៨ ខែមេសា ឆ្នាំ២០១៩នេះ ខណៈជនសង្ស័យរូបនេះបានចូលពួនសម្ងំនៅក្នុងផ្ទះនៅភូមិកើតហេតុ។

លោកវរសេនីយ៍ឯក នន ស៊ីណាត បន្តទៀតថា ជនសង្ស័យទី២មានឈ្មោះ ប្រាក់ គង់ ភេទប្រុស អាយុ២០ ឆ្នាំ រស់នៅភូមិឧកញ៉ាប៉ាង ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង។ ដោយឡែកជនសង្ស័យដែលមាននៅក្នុងរូបភាពកាន់ដាវនេះមិនទាន់ចាប់បាននៅឡើយទេ ហើយជនសង្ស័យរូបនេះមានឈ្មោះ ផាន់ សុផា ភេទប្រុស អាយុ១៩ឆ្នាំ។

លោកអធិការបានបញ្ជាក់ឲ្យដឹងថែមទៀតថា ករណីទំនាស់គ្នានេះគឺជារឿងគំនុំ ហើយក្នុងនោះ ក៏មានករណីបណ្តាលឲ្យរងរបួសម្នាក់ផងដែរមានឈ្មោះ ទី ភេទប្រុស អាយុជាង២០ឆ្នាំ មានទីលំនៅភូមិផ្សា ត្រាច ឃុំស្វាយ ស្រុកសាមគ្គីមានជ័យ។

គួររំលឹកថែមទៀតថា កាលពីថ្ងៃទី ១៧ ខែ មេសា ឆ្នាំ ២០១៩ ម្សិលមិញនេះ នគរបាលបានចាប់ខ្លួនជនសង្ស័យម្នាក់ផងដែរមានឈ្មោះ កង សារឿន ហៅបារាំង ភេទប្រុស អាយុ២៣ឆ្នាំ។ ចំពោះជនសង្ស័យដែលមានកាន់ដាវក្នុងរូបភាពនោះ បានរត់ទៅលាក់ខ្លួននៅស្រុកមួយ ក្នុងខេត្តកណ្តាល។

ក្រុមក្មេងទំនើងទាំងនេះបានប្រើដាវសាម៉ូរ៉ៃដេញកាប់គ្នា នៅចំណុចផ្លូវចូលវត្តត្រឡែងកែងថ្ងៃចូលឆ្នាំ បច្ចុប្បន្នសមត្ថកិច្ចកំពុងតាមចាប់ខ្លួនជនសង្ស័យដទៃទៀត៕

(ប្រភពព័ត៌មានពីផេករបស់អគ្គស្នងការនគរបាលជាតិ)

ដកស្រង់ព័ត៌មានដោយ៖ សីហា