ការប៉ះគ្នាយប់នេះ គ្រូ Bacelona សង្ឃឹមលើmessi
ថ្ងៃទី ១០ ឃែមេសា ឆ្នាំ ២០១៩ ម៉ោង 9:36PM
Ernesto Valverde អ្នកចាត់ការក្រុម FC Barcelona បានលើកឡើងថា ការធ្វើដំណើរទៅកីឡដ្ឋាន Old Trafford ប៉ះ Manchester United ក្នុងការប្រកួត UEFA Champions League វគ្គ៨ក្រុម ជើងទី១ នៅយប់នេះ គឺសង្ឃឹមលើតារាឆ្នើម Lionel Messi ថាអាចជួយឲ្យក្រុមអ្នកមានបុណ្យ ទទួលបានជ័យជម្នះ។
Messi ធ្លាប់ស៊ុតចូលក្រុមអង់គ្លេស ២២គ្រាប់ នៅ UEFA Champions League ដែលជាចំនួនច្រើនជាងកីឡាករណាៗទាំងអស់ ក្នុងប្រវត្តិសាស្ត្របាល់ទាត់។ ជាងនោះទៅទៀត កីឡាករជម្រើសជាតិអាហ្សង់ទីនរូបនេះ ក៏ធ្លាប់ស៊ុតចូល Man Utd នៅវគ្គផ្តាច់ព្រ័ត្រទាំងពីរលើក កាលឆ្នាំ ២០០៩ និងឆ្នាំ ២០១១ ផងដែរ។
“Messi ជាកីឡាករអស្ចារ្យ។ ខ្ញុំយល់ថា អ្នកចាត់ការទាំងអស់ និងកីឡាករគ្រប់រូប តែងតែរកមធ្យោបាយ ដើម្បីបញ្ឈប់គាត់។ យើងដឹងថា ពេលខ្លះពិតជាមានវិធី ដើម្បីរារាំងកីឡាកររូបណាម្នាក់។ យើងនឹងឃើញទាំងអស់គ្នា ថានឹងបែបណា។ ប៉ុន្តែយើងរំពឹងច្រើនណាស់ លើ Messi ហើយជាធម្មតាគាត់តែងតែធ្វើបាន (ស៊ុតចូល)”។ លោក Valverde បានលើកឡើង៕
អត្ថបទ៖ ពេជ្រ គឹមស្រ៊ិន
