គិតត្រឹមព្រឹកថ្ងៃទី១៧នេះកម្ពុជាយើងរកឃើញមានអ្នកឆ្លងជំងឺកូវីដ-១៩ ២៤នាក់ហើយ ក្នុងនោះ នៅភ្នំពេញច្រើនជាងគេ
(ភ្នំពេញ)៖ គិតត្រឹមព្រឹកថ្ងៃទី១៧ ខែមីនា ឆ្នាំ២០២០ កម្ពុជាបានរកឃើញអ្នកឆ្លងជំងឺកូវីដ១៩ ចំនួន ២៤នាក់ហើយ នៅ ៩ រាជធានីខេត្ត រួមមាន៖ ១-ខេត្តព្រះសីហនុ ម្នាក់ ២-សៀមរាប ម្នាក់ ៣-កំពង់ចាម ៣នាក់ ៤-ភ្នំពេញ ៧នាក់ ៥-ព្រះវិហារ ២នាក់ ៦-កំពង់ឆ្នាំង ២នាក់ ៧-បាត់ដំបង ៤នាក់ ៨-បន្ទាយមានជ័យ ២នាក់ ៩-កំពត ម្នាក់ និង១០-ត្បូងឃ្មុំ ម្នាក់។
គិតចាប់ពីថ្ងៃទី២៧ ខែមករា ឆ្នាំ២០២០ មកដល់ថ្ងៃទី១៧ ខែមីនា ឆ្នាំ២០២០ ក្រសួងសុខាភិបាល បានប្រកាសពីការរកឃើញអ្នកជំងឺកូវីដ១៩ ទាំង ២៤នាក់ ដែលមានខ្មែរ ១៦នាក់ និងបរទេស ៨នាក់ រួមមាន៖
-ថ្ងៃទី២៧ ខែមករា ឆ្នាំ២០២០ បុរសជនជាតិចិនម្នាក់ ដែលបានព្យាបាលជាសះស្បើយ កាលពីដើមខែកុម្ភៈ នៅខេត្តព្រះសីហនុ។
-ថ្ងៃទី៧ ខែមីនា ឆ្នាំ២០២០ បុរសខ្មែរម្នាក់ នៅខេត្តសៀមរាប។
-ថ្ងៃទី១០ ខែមីនា ឆ្នាំ២០២០ ស្ត្រីអ្នកទេសចរអង់គ្លេស ម្នាក់ នៅខេត្តកំពង់ចាម ដែលជាអ្នកធ្វើដំណើរ តាមនាវាទេសចរណ៍ មកពីប្រទេសវៀតណាម។
-ថ្ងៃទី១២ ខែមីនា ឆ្នាំ២០២០ អ្នកទេសចរអង់គ្លេស ២នាក់ប្តីប្រពន្ធ នៅខេត្តកំពង់ចាម ដែលជាអ្នកធ្វើដំណើរ តាមនាវាទេសចរណ៍ មកពីប្រទេសវៀតណាម។
-ថ្ងៃទី១៣ ខែមីនា ឆ្នាំ២០២០ បុរសជនជាតិកាណាដាម្នាក់ និងបុរសជនជាតិប៊ែលហ្សិកម្នាក់ នៅភ្នំពេញ។
-ថ្ងៃទី១៥ ខែមីនា ឆ្នាំ២០២០ បុរសបារាំងម្នាក់ នៅភ្នំពេញ។ បុរសខ្មែរម្នាក់ ទើបមកពីប្រទេសបារាំង នៅភ្នំពេញ។ ខ្មែរឥស្លាម ២នាក់ នៅព្រះវិហារ និងកូនរបស់បុរសបារាំង អាយុ ៤ខែម្នាក់ នៅភ្នំពេញ។
-ថ្ងៃទី១៦ ខែមីនា ឆ្នាំ២០២០ ខ្មែរឥស្លាម ១១នាក់ និងខ្មែរម្នាក់ ( នៅបន្ទាយមានជ័យ ២នាក់ ភ្នំពេញ ២នាក់ កំពង់ឆ្នាំង ២នាក់ បាត់ដំបង ៤នាក់ កំពត ម្នាក់ និងត្បូងឃ្មុំ ម្នាក់ )។
ក្រសួងសុខាភិបាល បានកត់សម្គាល់ថា ខ្មែរឥស្លាម ដែលរកឃើញឆ្លងជំងឺកូវីដ១៩ ចំនួន ១៣នាក់ខាងលើនេះ ជាស្ថិតក្នុងចំណោមខ្មែរឥស្លាម ៧៩នាក់ ដែលទើបមកពីចូលរួមពីពិធីបុណ្យ នៅប្រទេសម៉ាឡេស៊ី។
តាមរយៈសេចក្តីប្រកាស ក្រសួងសុខាភិបាល នៅព្រឹកថ្ងៃទី១៧ ខែមីនានេះ បានអំពាវនាវដល់សាធារណជន រក្សាភាពនឹងនរ ក្នុងចិត្ត កុំមានការភ័យខ្លាច ជឿទុកចិត្តលើវិធានការប្រយុទ្ធនឹងជំងឺកូវីដ១៩ របស់រាជរដ្ឋាភិបាល។ ក្នុងនោះ ក្រសួងសុខាភិបាល ក៏បានបន្តអំពាវនាវឲ្យប្រជាពលរដ្ឋរបស់យើង ថែរក្សាអនាម័យដៃ ខ្លួនប្រាណ ចំណីអាហារ និងបរិស្ថានជុំវិញខ្លួន ឲ្យបានជាប់ជាប្រចាំ។
ក្រសួងសុខាភិបាល ក៏បានប្រកាសយកសណ្ឋាគារផ្កាយប្រាំ Great Duke ដែលជាអតីតសណ្ឋាគារ អាំងទែកុងទីណង់តាល់ នៅជិតផ្សារដើមគរ ក្នុងរាជធានីភ្នំពេញ ធ្វើជាមន្ទីរពេទ្យ សម្រាប់ពិនិត្យ ថែទាំ និងព្យាបាលអ្នកជំងឺកូវីដ១៩។
ក្នុងនោះ ក្រុមគ្រូពេទ្យរបស់ក្រសួងសុខាភិបាល ក៏បានសហការជាមួយគ្រូពេទ្យទាហាន និងពេទ្យប៉ូលិស ដើម្បីរួមសហការគ្នា ប្រយុទ្ធនឹងជំងឺកូវីដ១៩ ឲ្យកាន់តែមានប្រសិទ្ធភាពខ្ពស់ ក្នុងបំណងបញ្ចៀសនូវការចម្លងក្នុងសហគមន៍ជាយថាហេតុ៕
