តុលាការបានចោទលោក កឹម សុខា តែម្នាក់គត់ ដែលជាប់ពាក់ព័ន្ធក្នុងសំណុំរឿងក្បត់ជាតិ មិនប៉ះពាល់អាមេរិក រដ្ឋបរទេស ឬភ្នាក់ងារបរទេសណាមួយនោះឡើយ
(ភ្នំពេញ)៖ អ្នកនាំពាក្យ នៃអយ្យការអមសាលាដំបូងរាជធានីភ្នំពេញ បានចេញសេចក្តីប្រកាសព័ត៌មាន នៅរសៀលថ្ងៃទី១២ ខែមីនានេះ ដោយបញ្ជាក់ថា ក្នុងសំណុំរឿងក្តីក្បត់ជាតិរបស់លោក កឹម សុខា គឺព្រះរាជអាជ្ញា បានចោទប្រកាន់តែលើលោក កឹម សុខា ម្នាក់គត់ ដោយមិនប៉ះពាល់អាមេរិក រដ្ឋបរទេស ឬភ្នាក់ងារបរទេសណាមួយនោះឡើយ។
ការបញ្ជាក់ដូច្នេះ ដើម្បីឆ្លើយតបភ្លាមៗ នឹងសេចក្តីថ្លែងការណ៍របស់ឯកអគ្គរដ្ឋទូតអាមេរិក លោក Patrick Murphy ដែលលើកឡើង នៅថ្ងៃទី១២ ខែមីនានេះថា “យើងមានការរំខានចិត្ត ដោយខាងព្រះរាជអាជ្ញា បានលើកឡើងនូវរឿងមិនពិត ដែលត្រូវបានប្រឌិតឡើង ទាក់ទងនឹងសហរដ្ឋអាមេរិក”។
ក្នុងសេចក្តីប្រកាសព័ត៌មាន ចុះថ្ងៃទី១២ ខែមីនា ឆ្នាំ២០២០ អ្នកនាំពាក្យអយ្យការអមសាលាដំបូងរាជធានីភ្នំពេញ បានបញ្ជាក់ថា ក្នុងដំណើរការនៃការជំនុំជម្រះក្តីលើសំណុំរឿង ពាក់ព័ន្ធនឹងជនជាប់ចោទ ឈ្មោះ កឹម សុខា ពីបទសន្ទិដ្ឋិភាពជាមួយបរទេស តាមបញ្ញត្តិមាត្រា ៤៤៣ ក្រុមព្រហ្មទណ្ឌនៃព្រះរាជាណាចក្រកម្ពុជា គឺព្រះរាជអាជ្ញា ពុំបានចោទប្រកាន់ប៉ះពាល់ទៅលើសហរដ្ឋអាមេរិក រដ្ឋបរទេស ឬភ្នាក់ងារបរទេសណាមួយនោះឡើយ។
អ្នកនាំពាក្យនៃអយ្យការអមសាលាដំបូងរាជធានីភ្នំពេញ ក៏បានគូសបញ្ជាក់ថា នៅក្នុងដំណើរការជំនុំជម្រះលើសំណុំរឿងក្តីនេះ គឺមានសាធារណជនជាតិ និងអន្តរជាតិជាច្រើន ចូលរួមស្តាប់ និងសង្កេតការណ៍គ្រប់ពេលសវនាការ។
សូមរម្លឹកថា ចាប់តាំងពីថ្ងៃទី១៥ ខែមករា ឆ្នាំ២០២០ តុលាការសាលាដំបូងរាជធានីភ្នំពេញ បានបើកសវនាការ ជំនុំជម្រះលើសំណុំរឿងក្តីរបស់លោកកឹមសុខា ពាក់ព័ន្ធនឹងបទក្បត់ជាតិ។ ក្នុង ១សប្តាហ៍ តុលាការបើកសវនាការជំនុំជម្រះ ១ថ្ងៃកន្លះ នៅថ្ងៃពុធ និងព្រឹកថ្ងៃព្រហស្បតិ៍ ដោយលោកកឹម សុខា ដែលស្ថិតនៅក្រៅឃុំ អមដោយក្រុមមេធាវីរបស់លោក បានចូលរួមសវនាការ តតាំងក្តីរៀងរាល់ពេល៕
