វិទ្យាល័យជាស៊ីមសាមគ្គី បានអនុវត្តនូវវិធានការអនាម័យសម្រាប់សិស្សានុសិស្ស របស់ខ្លួន
ភ្នំពេញ ៖ គ្រឹះស្ថានសិក្សាកំពុងបង្កើនវិធានការអនាម័យសម្រាប់សិស្សរបស់ខ្លួន ដែលជាការឆ្លើយតបទៅ នឹងសេចក្ដីណែនាំ របស់ក្រសួងអប់រំ ក្នុងការរក្សាអនាម័យ ទប់ស្កាត់ ការឆ្លងនូវវីរុស Covid-19 ។ វិធានការអនាម័យនេះ គឺតម្រូវឱ្យគ្រប់គ្រឹះស្ថានសិក្សាទូទាំងប្រទេស រៀបចំការអនុវត្តទូទាំងប្រទេសទៅតាមលទ្ធភាពជាក់ស្ដែងរបស់ខ្លួន។
ក្នុងចំណោមគ្រឹះស្ថានសិក្សាជាច្រើនក្នុងរាជធានីភ្នំពេញ វិទ្យាល័យជាស៊ីមសាមគ្គី ក៏បានអនុវត្តនូវវិធានការអនាម័យ សម្រាប់សិស្សានុសិស្សយ៉ាងតឹងរឹងផងដែរ។ វិធានការអនាម័យនេះ គឺចាប់ផ្ដើមអនុវត្តចាប់ពីចន្លោះម៉ោង ៦.៣០នាទីព្រឹក សម្រាប់ម៉ោងសិក្សាពេលព្រឹក និងម៉ោងប្រមាណ ១២.៤០ថ្ងៃត្រង់ សម្រាប់សិស្សដែលសិក្សាវេនថ្ងៃ។ ការអនុវត្តវិធានការអនាម័យនេះ រាប់បញ្ចូលទាំងការវាស់កម្ដៅ និងការលាងសម្អាតដៃរបស់សិស្សជាមួយ អាល់កុល។
សកម្មភាពទាំងនេះ ទទួលបានគាំទ្រនិងពេញចិត្តជាខ្លាំងសម្រាប់សិស្សដែល សិក្សានៅទីនេះផ្ទាល់ ហើយពួកគាត់ក៏សង្ឃឹមដែរថា គ្រប់គ្រឹះស្ថានសិក្សាទូទាំងប្រទេស អាចអនុវត្តយ៉ាងម៉ត់ចត់នូវវិធានការអនាម័យ ក្នុងការទប់ស្កាត់ ការឆ្លងនូវវីរុស Covid-19។
ការដាក់ចេញឱ្យអនុវត្តនូវវិធានការអនាម័យនេះ លោក ផាន់ ណិល នាយក វិទ្យាល័យជាស៊ីមសាមគ្គីលើកឡើងថា គឺជាការឆ្លើយតបទៅនឹងសេចក្ដីណែនាំរបស់ក្រសួងអប់រំ និងជាការគិតគូរ ដល់សុខភាពសិស្ស ជាពិសេសរួមចំណែកជាមួយរាជរដ្ឋាភិបាលកម្ពុជា ក្នុងទប់ស្កាត់កុំឱ្យមានការឆ្លងវីរុស Covid-19។
ថ្មីៗកន្លងមកនេះ ក្រសួងអប់រំ ក៏បានចេញសេចក្ដីណែនាំ ឱ្យគ្រប់គ្រឹះស្ថានសិក្សាទាំងអស់ ត្រូវចាត់វិធានការអនាម័យ ដោយរាប់បញ្ចូលទាំងការសាងសង់កន្លែងដៃ ការតម្រូវឱ្យសិស្សលាងសម្អាតដៃជាប្រចាំទៅតាមលទ្ធភាពជាក់ស្ដែង។ ក្នុងនោះ ក៏តម្រូវឱ្យគ្រឹះ ស្ថានសិក្សាត្រូវធ្វើការជិតស្និទ្ធជាមួយ មណ្ឌលសុខភាព រឺមន្ទីរពេទ្យដែលនៅជិត ដើម្បីតាមដានសុខភាពសិស្សផងដែរ៕អត្ថបទ៖គឹមស្រ៊ិន
