អ្នកស្លាប់កើនឡើងដល់ ៤២៦នាក់ និងមានការឆ្លងជាង ២ម៉ឺនករណីនៅទូទាំងពិភពលោក
ចិន៖ យោងតាមសារព័ត៌មានRT CNN និង South China Morning Post ឲ្យដឹងថា ចំនួនអ្នកបាត់បង់ជីវិតបានកើនឡើងដល់ចំនួន ៤២៦នាក់ហើយដោយវីរុសផ្លូវដង្ហើមកូរ៉ូណា ខណៈវីរុសនេះបានឆ្លងរាលដាលបន្ថែមចំនួន ៣២៣៥ករណីថ្មី ដែលរុញច្រានកំណើនចម្លងសរុបដល់ទៅចំនួនជាង ២០,៦២២ករណីនៅទូទាំងពិភពលោកគិតត្រឹមព្រឹកថ្ងៃអង្គារ ទី០៤ ខែកុម្ភៈ ឆ្នាំ២០២០នេះ។
គិតត្រឹមថ្ងៃអង្គារនេះដែរ ប្រទេសចំនួន ២៧ប្រទេសនៅជុំវិញពិភពលោកបានឆ្លងវីរុសផ្លូវដង្ហើមកូរ៉ូណា ហើយចិនជាប្រទេសមានមនុស្សស្លាប់ និងឆ្លងច្រើនជាងគេ ដែលក្នុងចំណោមមនុស្សបាត់បង់ជីវិតសរុបចំនួន ៤២៦នាក់គឺនៅប្រទេសចិនមានចំនួន ៤២៥នាក់ និងនៅហ្វីលីពីនម្នាក់។
លើសពីប្រទេសចិនករណីចំនួន ១៥៥ករណីត្រូវបានបញ្ជាក់នៅទូទាំង ប្រទេសយ៉ាងតិច ២៥ប្រទេសដែលភាគច្រើននៃការឆ្លងទាំងនោះគឺនៅអាស៊ី រួមមានប្រទេសជប៉ុន, កូរ៉េខាងត្បូង, សិង្ហបុរី និងថៃ ក៏ដូចជានៅសហរដ្ឋអាមេរិក, បារាំង, អង់គ្លេស, រុស្ស៊ី និងកន្លែងផ្សេងទៀត។
