ចាប់បានអ្នកចែកចាយគ្រឿងញៀនទ្រង់ទ្រាយធំ២នាក់ បន្ទាប់ពីចាប់បានថ្នាំញៀនជាង៩គីឡូក្រាម

(ភ្នំពេញ)៖ សមត្ថកិច្ចនគរបាលមន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ នៅព្រឹកថ្ងៃទី១៤ ខែមករា ឆ្នាំ២០២០នេះ បានបញ្ជូនជនសង្ស័យចំនួន០២នាក់ ទី១៖ឈ្មោះ គឹម វ៉ា និងទី២៖ឈ្មោះ កែវ សុធា ព្រមទាំងសារធាតុញៀនដែលរឹបអូសបានប្រភេទ មេតំហ្វេតាមីន (ICE) ទម្ងន់៩.៦គីឡូក្រាម មកកាន់សាលាដំបូងរាជធានីភ្នំពេញ ដើម្បីប្រគល់ជូនតំណាងអយ្យការ បើកការស៊ើបសួរ និងចោទប្រកាន់តាមផ្លូវច្បាប់។
កម្លាំងមន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ បានបើកប្រតិបត្តិការបង្ក្រាបជនចែកចាយគ្រឿងញៀនទ្រង់ទ្រាយធំមួយ នៅខណ្ឌពោធិ៍សែនជ័យ រាជធានីភ្នំពេញ និងស្រុកថ្ពង ខេត្តកំពង់ស្ពឺ រឹបអូសបានថ្នាំញៀនសរុបជាង៩គីឡូក្រាម។

មន្ដ្រីជាន់ខ្ពស់មន្ទីរប្រឆាំងគ្រឿងញៀន បានអោយដឹងថាប្រតិបត្តិការនេះ ធ្វើឡើងនៅល្ងាចថ្ងៃទី១០ ខែមករា ឆ្នាំ២០២០ នៅចំណុចផ្ទះគ្មានលេខ ផ្លូវទំនប់កប់ស្រូវ ភូមិសំរោងក្រោម សង្កាត់សំរោង ខណ្ឌពោធិ៍សែនជ័យ រាជធានីភ្នំពេញ និងនៅចំណុចភូមិជ្រាវ ឃុំអមលាំង ស្រុកថ្ពង ខេត្តកំពង់ស្ពឺ។

ការបង្ក្រាបនេះធ្វើឡើងក្រោយទទួលបញ្ជាពី នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ, នាយឧត្តមសេនីយ៍ ម៉ក់ ជីតូ អគ្គស្នងការរង និងលោកឧត្តមសេនីយ៍ឯក ឡឹក វណ្ណៈ ប្រធានមន្ទីរប្រឆាំងគ្រឿងញៀន ក្រោមការសម្របសម្រួលពីតំណាងអយ្យការ លោក ខាំ សុផារី និងដឹកនាំប្រតិបត្តិការផ្ទាល់ដោយ ឧត្តមសេនីយ៍ទោ ឃឹង សារ៉ាត់ នាយករងមន្ទីរប្រឆាំងគ្រឿងញៀន។

មន្ដ្រីខាងលើបានបន្ថែមថា ជាលទ្ធផលសមត្ថកិច្ចឃាត់ខ្លួន ជនសង្ស័យ០២នាក់ ទី១៖ឈ្មោះ គឹម វ៉ា និងទី២៖ឈ្មោះ កែវ សុធា ព្រមទាំងដកហូតសារធាតុញៀន មេតំហ្វេតាមីន (ICE) ទម្ងន់៩.៦គីឡូក្រាម, រថយន្ត២គ្រឿង, ជញ្ជីងថ្លឹង២គ្រឿង និងទូរស័ព្ទ២គ្រឿង។ សមត្ថកិច្ចមួយរូបបានលួចបង្ហើបឲ្យដឹងថា ករណីបង្ក្រាបគ្រឿងទ្រង់ទ្រាយធំរហូតដល់ជិត១០គីឡូក្រាម ឃាត់ខ្លួនមនុស្ស២នាក់នេះ មានគេកំពុងព្យាយាមចង់រត់ការជួយជនសង្ស័យ៕