គ្រឹះស្ថានឧត្តមសិក្សានៅកម្ពុជាបន្តទទួលបានការអនុគ្រោះពន្ធ៣ឆ្នាំបន្តទៀតពីរាជរដ្ឋាភិបាលកម្ពុជា

(ភ្នំពេញ)៖ នៅរសៀលថ្ងៃពុធ ទី១៨ ខែធ្នូ ឆ្នាំ២០១៩ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានអនុញ្ញាតិអោយសមាគមគ្រឹះស្ថានឧត្តមសិក្សា ដែលដឹកនាំដោយឯកឧត្តម ហេង វ៉ាន់ដា ជួបពិភាក្សាការងារ នៅវិមានសន្តិភាព។៊

លោក អ៊ាង សុផាល្លែត ជំនួយការសម្តេចតេជោបានអោយនៅក្រោយជំនួបថា ក្នុងជំនួបនោះ ឯកឧត្តម ហេង វ៉ាន់ដា បានគោរពរាយការណ៍ជូនសម្ដេចតេជោ អំពីវឌ្ឍនភាពរបស់សមាគមគ្រឹះស្ថានឧត្តមសិក្សាកម្ពុជារយៈពេលមួយឆ្នាំកន្លងមក។ ហើយឆ្លៀតក្នុងឱកាសនោះ ឯកឧត្តមក៏បានគោរពស្នើសុំការណែនាំ និងអនុសាសន៍ដ៏ខ្ពង់ខ្ពស់ពីសម្ដេចតេជោ និងសុំនូវសេចក្តីសម្រេចលើបញ្ហា០៣ដែលក្នុងនោះរួមមាន៖
ទី១)គឺសុំបន្តការអនុគ្រោះដល់លើបញ្ហាពន្ធដូចដែលបានអនុវត្តកន្លងមក គឺសូមអនុគ្រោះ
ពីឆ្នាំ២០២០ រហូតដល់ឆ្នាំ២០២៣ ដូចដែលបានធ្វើកន្លងមក។ ទី២)គឺការវាយតម្លៃគុណភាពគ្រឹះស្ថានឧត្តមសិក្សា និងទី៣)គឺការពង្រីកវិសាលភាពគរុកោសល្យ។ លើសពីនេះទៅទៀត សម្ដេចតេជោក៏បានមានប្រសាសន៍លើកឡើងអំពីចំណុច០៨
ផ្សេងទៀតដែលមានការស្នើសុំជាលាយល័ក្ខអក្សរតាមរយៈទីស្ដីការគណៈរដ្ឋមន្ត្រី។

ជាការឆ្លើយតប ទី១ សម្ដេចតេជោ ហ៊ុន សែន បានឯកភាពលើបញ្ហាអនុគ្រោះពន្ធ គឺបន្តអនុគ្រោះពន្ធឆ្នាំ ២០២០ ដល់ឆ្នាំ២០២៣។ ទី២ ទាក់ទងទៅនឹងការពង្រីកវិសាលភាពបណ្ដុះបណ្ដាលគរុកោសល្យ សម្ដេចតេជោបានមានប្រសាសន៍ថា ករណីនេះត្រូវធ្វើតាមវិទ្យាស្ថានជាតិអប់រំបណ្ដុះបណ្ដាលគរុកោសល្យដែលមានស្រាប់។

ចំណុចពិសេសដែលបានលើកឡើងក្នុងសំណើរ០៨ ក្រៅពីសំណើ០៣ដែលបានលើកឡើង ឯកឧត្តម ហេង វ៉ាន់ដា នោះគឺ ស្នើសុំអនុញ្ញាតឱ្យគ្រឹះស្ថានឧត្តមសិក្សាបើកវគ្គបណ្ដុះបណ្ដាលជំនាញសុខាភិបាល គឺសាកលវិទ្យាល័យអន្តរជាតិស្នើបើកសាខានៅខេត្តកំពត។ ករណីនេះ សម្ដេចតេជោមិនអនុញ្ញាតនោះទេ។ ចំពោះចំនុចជាកង្វល់ និងសំណើដទៃទៀត សម្ដេចតេជោបានធ្វើការណែនាំអោយឧត្តម ហ៊ីង ថូរ៉ាស៊ី ដើម្បីចេញជា ស. ជ .ណ តែម្ដង៕