ខេត្តកំពត ត្រៀមរៀបចំផែនការការពារ សន្ដិសុខ សុវត្ថិភាព និងសណ្ដាប់ធ្នាប់ ក្នុងពិធីបុណ្យសមុទ្រ

(កំពត)៖ នៅសល់តែប៉ុន្មានថ្ងៃទៀតប៉ុណ្ណោះបុណ្យសមុទ្រនៅខេត្តកំពតនឹងចូលមកដល់ គឺនៅថ្ងៃទី២០ ដល់ថ្ងៃទី២២ ខែធ្នូ ឆ្នាំ២០១៩។

នាយឧត្តមសេនីយ៍ ទូច ណារ៉ុថ អគ្គស្នងការរងនគរបាលជាតិ និងជាប្រធាននាយកដ្ឋានអង្គរក្ស នៅថ្ងៃទី១៧ ខែធ្នូ ឆ្នាំ២០១៩នេះ បានដឹកនាំកិច្ចប្រជុំ ត្រួតពិនិត្យផែនការការពារសន្តិសុខ សុវត្ថិភាព សណ្តាប់ធ្នាប់ ក្នុងពិធីបុណ្យសមុទ្រនេះ។ កិច្ចប្រជុំនេះ ក៏មានការចូលរួមពី លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត, អាជ្ញាធរពាក់ព័ន្ធ និងកងកម្លាំងប្រដាប់អាវុធជាច្រើននាក់ទៀតផងដែរ ដែលកិច្ចប្រជុំនេះ ធ្វើឡើងនៅស្នងការដ្ឋាននគរបាលខេត្ដកំពត។

ក្នុងកិច្ចប្រជុំនោះ នាយឧត្តមសេនីយ៍ ទូច ណារ៉ុថ បានដាក់បទបញ្ជាឲ្យកម្លាំងនគរបាលទាំងអស់ ត្រូវសហការជាមួយស្ថាប័នពាក់ព័ន្ធ ធានាឲ្យបាននូវ សន្ដិសុខ សុវត្ថិភាព និងសណ្ដាប់ធ្នាប់សាធារណៈ ដើម្បីឲ្យការប្រារព្ធពិធីបុណ្យសមុទ្រដំណើរការប្រកបដោយភាពជោគជ័យ ពិសេសការពារសន្ដិសុខ សុវត្ថិភាព ឲ្យបានដាច់ខាតជូន សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងសម្ដេចកិត្តិព្រឹទ្ធបណ្ឌិត ព្រមទាំងថ្នាក់ដឹកនាំខ្ពស់ជាតិ-អន្ដរជាតិ មន្ដ្រីរាជការ សិស្សានុសិស្ស ប្រជាពលរដ្ឋ និងភ្ញៀវទេសចរ ដែលអញ្ជើញចូលរួម។

លោកឧត្តមសេនីយ៍ទោ ម៉ៅ ច័ន្ទមធុរិទ្ធ ក៏បានណែនាំឲ្យកម្លាំងត្រូវពង្រឹងកិច្ចការពារសន្ដិសុខផ្លូវហោះហើរ សណ្ឋាគារ ផ្ទះសំណាក់ដែលគណៈប្រតិភូស្នាក់អាស្រ័យ និងការពារសុវត្ថិភាពតាមដងផ្លូវ និងរៀបចំសណ្ដាប់ធ្នាប់ចរាចរណ៍ឲ្យបានល្អ ដើម្បីសម្រួលដល់ការធ្វើដំណើរ ជូនក្បូនរថយន្ដរបស់គណៈប្រតិភូ និងភ្ញៀវទេសចរនានា។ លោកម៉ៅ ច័ន្ទមធុរិទ្ធ បានក្រើនរំលឹកឲ្យកម្លាំងត្រូវបង្កើនកិច្ចសហប្រតិបត្តិការល្អ ជាមួយសមត្ថកិច្ចពាក់ព័ន្ធ ដោយប្រើប្រាស់គ្រប់វិធានការ និងប្រើប្រាស់កម្លាំងសរុប មធ្យោបាយសរុប ដើម្បីរក្សាការពារ សន្ដិសុខ សុវត្ថិភាព និងរៀបចំសណ្ដាប់ធ្នាប់សាធារណៈឲ្យមានរបៀបរៀបរយ៕