សម្តេចតេជោ ហ៊ុន សែន បានបញ្ចប់ការទទួលថវិកាពីសប្បុរសជនសាងសង់អគារនៅមន្ទីរពេទ្យកាល់ម៉ែត ខណៈថវិកាសរុបមានជាង ១០៤លានដុល្លារ

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសបញ្ចប់ការទទួលថវិកាពីសប្បុរសជនសម្រាប់សាងសង់អគារមន្ទីរពេទ្យ និងបំពាក់ឧបករណ៍នៅមន្ទីរពេទ្យកាល់ម៉ែតហើយ នៅវេលាម៉ោង៧ល្ងាចថ្ងៃទី១៦ ខែធ្នូ ឆ្នាំ២០១៩នេះ។ ថវិកាទទួលបានពីសម្បុរសជន និងថវិការដ្ឋ៣០លានផងនោះ ធ្វើឱ្យចំនួនថវិកាសម្រាប់សាងសង់អគារ និងបំពាក់ឧបករណ៍នៅមន្ទីរពេទ្យកាល់ម៉ែតមានរហូតដល់ទៅជាង ១០៤លានដុល្លារអាមេរិក។

សម្តេចតេជោ ហ៊ុន សែន បានបញ្ជាក់នៅលើទំព័រ Facebook ថា មកដល់ម៉ោង៥ល្ងាចថ្ងៃទី១៦ ខែធ្នូ ឆ្នាំ២០១៩នេះ សប្បុរសជនដែលបានចូលរួមបានថវិកាសរុបចំនួន ៧៤,៥៥៣,៥៣៦ដុល្លារ និងប្រាក់រៀលចំនួន ២៧១,៥១៤,៧០០រៀល។ បើគិតទាំងថវិការដ្ឋ ៣០លានដុល្លារផង ធ្វើឱ្យចំនួនថវិកាមានរហូតដល់ ១០៤,៥៥៣,៥៣៦ដុល្លារ និងប្រាក់រៀលចំនួន ២៧១,៥១៤,៧០០រៀល។

សម្តេចតេជោ ហ៊ុន សែន បានថ្លែងអំណរគុណចំពោះសប្បុរសជនដែលបានបរិច្ចាគថវិកា ដើម្បីសង្រ្គោះជិវិតមនុស្សតាមរយៈការធ្វើទំនើបកម្មមន្ទីរពេទ្យកាល់ម៉ែត ឱ្យក្លាយទៅជាមន្ទីរពេទ្យបង្អែករបស់ជាតិដែលមានលក្ខណៈទំនើប និងពហុឯកទេស។

សូមរំលឹកថា កាលពីថ្ងៃទី២៣ ខែវិច្ឆិកា ឆ្នាំ២០១៩កន្លងទៅនេះ សម្តេចតេជោ ហ៊ុន សែន បានសម្រេចបញ្ចេញកញ្ចប់ថវិកាជាតិប្រមាណ ៣០លានដុល្លារអាមេរិក សម្រាប់សាងសង់អគារព្យាបាលជំងឺនៅមន្ទីរពេទ្យកាល់ម៉ែតដែលកំពុងដំណើរការសាងសង់។ អគារព្យាបាលជំងឺនេះ មានកម្ពស់ ១២ជាន់ ដែលបច្ចុប្បន្នមន្ទីរសាងសង់ បានប្រមាណ ១៧ភាគរយរួចហើយ។ អគារមន្ទីរពេទ្យនេះ គ្រោងចំណាយថវិកាសាងសង់ប្រមាណ ៣៩លាន ៧សែនដុល្លារអាមេរិក។
សម្តេចតេជោ គឺចង់ធ្វើឱ្យមន្ទីរពេទ្យនេះ ក្លាយទៅជាមន្ទីរពេទ្យបង្អែករបស់ជាតិកម្ពុជា ដែលទំនើបសម្រាប់ជួយសង្គ្រោះជីវិតរបស់ប្រជាពលរដ្ឋ៕