លោក ពេជ្រ ស្រស់ ថា កែវ សុខផេង ធ្វើមិនបានល្អសំរាប់ក្រុមរួម និងសំរាប់មុខមាត់ជាតិ

ផ្ទុយពីអ្នកតាមដានវិស័យបាល់ទាត់ រួមជាមួយសម្តេចតេជោ ដែលលើកទឹកចិត្ត កែវ សុខផេង ដែលស៊ុតប៉េណាំងទីមិនចូល ប្រធានបក្សយុវជនកម្ពុជា លោក ពេជ្រ ស្រស់ ថា កែវ សុខផេង ធ្វើមិនបានល្អសំរាប់ក្រុមរួម និងសំរាប់មុខមាត់ជាតិ​។

លោក ពេជ្រ ស្រស់ បានលើកឡើងតាមហ្វេសបុកថាជូនចំពោះប្អូនប្រុស កែវ សុខផេង ប្អូនជាទីស្រលាញ់ មួយរយៈកន្លងទៅនេះគឺប្អូនទទួលបានសារលើកទឹកចិត្តច្រើនណាស់ពីពលរដ្ឋខ្មែរជាពិសេសនាយករដ្ឋមន្រ្តីតែម្តង។ បងសុំខុសពីគេចុះ ដោយបងសុំជួយដាស់តឿនប្អូនក្នុងពេលប្អូនធ្វើមិនបានល្អសំរាប់ក្រុមរួម និងសំរាប់មុខមាត់ជាតិ ពីព្រោះប្អូនទៅប្រកួតគឺតំណាងឲ្យជាតិខ្មែរដូច្នេះគ្រាប់បាល់១គ្រាប់របស់ប្អូនគឺតំណាងឲ្យជាតិខ្មែរទាំងមូល។

ប្រធានបក្សរូបនេះបន្ថែមថា បងដឹងច្បាស់ណាស់ថា កីឡារគឺមានឈ្នះ និង មានចាញ់ ជារឿងធម្មតា ប៉ុន្តែរឿងធ្វើតំណាងឲ្យជាតិគឺមិនមែនជារឿងធម្មតានោះទេ បើមិនមានសមត្ថភាពឲ្យលើសកីឡាករគេទេនោះ គឺយើងនឹងចាញ់គេជាមិនខាន។

បើប្អូនទាត់ពេលបណ្តើរបាល់ហើយគេមករារាំង ហើយប្អូនទាត់មិនចូលគឺប្អូនមិនមានកំហុសនោះទេ ប៉ុន្តែនេះគេទុក
បាល់មួយកន្លែងចំងាយ១១ម៉ដោយគ្មាននរណាមកឆាឆៅបែរជាប្អូនទាត់មិនចូលទៅវិញ។ប៉ុន្តែទោះបីជាយ៉ាងណាគឺប្អូនត្រូវខិតខំបន្ថែមទៀត ហើយកុំមើលងាយស្ថានការណ៍ឲ្យសោះ នឹងកុំអំនួតជាមួយគូរប្រជែង ត្រូវសម្លឹងគោលដៅ
ឲ្យច្បាស់ ហើយសម្រុកចូលកុំងាកក្រោយ។ នេះជាការបញ្ជាក់របស់លោក ពេជ្រ ស្រស់ ។

លោក ពេជ្រ ស្រស់ បន្តថា កំហុសនឹងគុណសម្បត្តិត្រូវតែបែងចែកឲ្យដាច់ ហើយការលើកទឹកចិត្តក្នុងពេលខ្លះធ្វើឲ្យយើងភ្លេចខ្លួន។ ជាចុងក្រោយគឺបងជូនពរប្អូនឲ្យជោគជ័យក្នុងអាជីពជាកីឡាករបាល់ទាត់។បងសុំផ្តាំមួយម៉ាត់ទៀត គឺសូមប្អូន​កុំភ្លេចរៀនពីបទពិសោធន៍បរាជ័យ។