សម្តេចតេជោ ហ៊ុន សែន៖ ប្រជាកសិករត្រូវចេះសន្សំសំចៃទឹក ជាពិសេសសូមធ្វើស្រែប្រាំងតែម្តងបានហើយ ឬអាចកាត់បន្ថយពីការធ្វើស្រូវប្រាំង មកដាំដំណាំបន្លែបង្ការជំនួសវិញជាការល្អ

(ភ្នំពេញ)៖ យោងទៅលើបញ្ហាបម្រែបម្រួលអាកាសធាតុ និងកម្ពុជាយើងត្រូវជួបនឹងការខ្វះខាតទឹកប្រើប្រាស់នោះ នៅថ្ងៃនេះ សម្តេចតេជោនាយករដ្ឋមន្ត្រីកម្ពុជា បានមានប្រសាសន៍ពីបញ្ហាខ្វះខាតទឹកប្រើប្រាស់ក្នុងឆ្នាំនេះ ដោយសម្តេចបានមានប្រសាសន៍អោយប្រជាកសិករទាំងអស់ត្រូវចេះសន្សំសំចៃទឹក ជាពិសេសសូមអោយពលរដ្ឋធ្វើស្រែប្រាំងតែម្តងបានហើយ ឬអាចកាត់បន្ថយពីការធ្វើស្រូវប្រាំង មកដាំដំណាំ បន្លែបង្ការជំនួសវិញជាការល្អ។ សម្តេចតេជោបានមានប្រសាសន៍បែបនេះនៅក្នុង ពីធីប្រគល់សញ្ញាបត្រជូននិស្សិតនៃសាកលវិទ្យាល័យឯកទេសនៃកម្ពុជា (CUS) ជិត៧ពាន់នាក់ នៅកោះពេជ្រ នាព្រឹកថ្ងៃទី១១ធ្នូនេះ។

សម្តេចតេជោនាយករដ្ឋមន្ត្រីក៏បានបន្តទៀតថា ពេលនេះរដូវប្រមូលផលស្រូវបានមកដល់ហើយ ទាំងស្រូវវស្សាទាំងស្រូវប្រាំង។ សម្តេចតេជោក៏បានអំពាវនាវទៅដល់ម្ចាស់រោងម៉ាស៊ិនកិនស្រូវទាំងអស់ សូមកុំមានទំលាក់ថ្លៃស្រូវរបស់ប្រជាកសិករអោយសោះ ត្រូវកំណត់តម្លៃអោយបានសមរម្យ។
ហើយក្រសួងពាណិជ្ជកម្ម , ក្រសួងសេដ្ឋកិច្ច ត្រូវពិនិត្យ និងតាមដានបញ្ហានេះអោយបានម៉ត់ចត់ដើម្បីផលប្រយោជន៍ដល់ប្រជាពលរដ្ឋយើង៕