សម្តេចតេជោ ហ៊ុន សែន សូមអោយកីឡាករ កែវ សុខផេង កុំមានការបាក់ទឹកចិត្តចំពោះលទ្ធផលចាញ់មីយ៉ាន់ម៉ាម្សិលមិញនោះ

(ភ្នំពេញ)៖ ថ្លែងនៅក្នុងពិធីប្រគល់សញ្ញាបត្រជូននិស្សិតនៃសាកលវិទ្យាល័យឯកទេសនៃកម្ពុជា (CUS) ជិត៧ពាន់នាក់នាព្រឹកថ្ងៃទី១១ ខែធ្នូឆ្នាំ២០១៩នេះ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានថ្លែងកោតសរសើរ និងអបអរសាទរ ចំពោះកីឡាករ កីឡាការិនីទាំងអស់ដែលបានទៅចូលរួមប្រកួតកីឡាស៊ីហ្គេមលើកទី៣០ នៅប្រទេសហ្វីលីពីន។

សម្តេចតេជោបានមានប្រសាសន៍ថា ក្នុងការប្រកួតស៊ីហ្គេមលើកនេះ កម្ពុជាយើងបានឈ្នះបានមេដាយជាច្រើនគ្រឿង ក្នុងនោះមាទាំងមេដាមាស ប្រាក់ និងសំរឹទ្ធ ។ ទាក់ទងនឹងការប្រកួតបាល់ទាត់រវាងកម្ពុជា និងមីយ៉ាន់ម៉ាកាលពីម្សិលមិញដោយយើងចាញ់មយ៉ាន់ម៉ានោះ សម្តេចតេជោបានមានប្រសាសន៍ថា នេះជាប្រវត្តិសាស្ត្រដែលកម្ពុជាបានឆ្លងដល់វគ្គពាក់កណ្តាលផ្តាច់ព្រាត់។

សម្តេចតេជោក៏សូមលើកទឹកចិត្តដល់កីឡាករ កែវ សុខផេង កុំអោយបាក់ទឹកចិត្តក្នុងការប្រកួតជាមូយមីយ៉ាន់ម៉ាម្សិលមិញនេះ ។ សម្តេចក៏អរគុណដល់អ្នកគាំទ្រវិស័យកីឡាទាំងអស់និងអរគុណដល់អាជ្ញាធរ រាជធានីខេត្តក្រុង ដែលបានដាក់ LED ផ្សាយបន្តផ្ទាល់ តាមកន្លែងផ្សេងៗអោយប្រជាពលរដ្ឋតាមដានបាល់ទាត់ស៊ីហ្គេម និងគាំទ្រលើកទឹកចិត្តកីឡាករយើង ទោះបីជាយើងទទួលបានលទ្ធផលបែបណាក៏ដោយ៕