សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សួរសុខទុក្ខ និងផ្តល់អំណោយជូន អ្នកជំងឺ និងស្ត្រីទេីបសម្រាលកូន-ស្ត្រីមានផ្ទៃពោះ នៅមន្ទីរពេទ្យកាល់ម៉ែត្រ
(ភ្នំពេញ)៖ ក្នុងកំឡុងពេលកំពុងមេីលថែទាំ អ្នកឧកញ៉ា ព្រឹទ្ធមហាឧបាសិកា ធម្មញ្ញាណវិវឌ្ឍនា ប៊ុន ស៊ាងលី ដែលជាមាតាបង្កើតនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជានៅថ្ងៃទី ៧ ខែធ្នូ ឆ្នាំ២០១៩ នេះ បានអញ្ជើញផ្តល់អំណោយជូន អ្នកជំងឺ និងស្ត្រីទេីបសម្រាលកូន-ស្ត្រីមានផ្ទៃពោះចំនួន ១.១២៣នាក់ និងបុគ្គលិក-កម្មករ ១.៦១៧នាក់ នៅមន្ទីរពេទ្យកាល់ម៉ែត ។
ក្នុងកំឡុងពេលកំពុងមេីលថែទាំ អ្នកឧកញ៉ា ព្រឹទ្ធមហាឧបាសិកា ធម្មញ្ញាណវិវឌ្ឍនា ប៊ុន ស៊ាងលី ដែលជាមាតា សម្តេចកិត្តិព្រឹទ្ធបណ្ឌិត និងជាមាតាក្មេក សម្តេចតេជោ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជេីញចុះសួរសុខទុក្ខលោកយាយ ម៉ោង ទឹម អាយុ ១០១ឆ្នាំ ដែលកំពុងសម្រាកព្យាបាលនៅមន្ទីរពេទ្យកាល់ម៉ែត។
ទន្ទឹមនឹងនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានចាត់ឱ្យលោកជំទាវកិត្តិបណ្ឌិត អ៊ុក ម៉ាលី អគ្គហេរញ្ញិកកាកបាទក្រហមកម្ពុជា ជាតំណាងដ៏ខ្ពង់ខ្ពស់របស់ សម្តេច កិត្តិព្រឹទ្ធបណ្ឌិត រួមដំណេីរជាមួយគណៈប្រតិភូ ថ្នាក់ដឹកនាំ មន្ត្រី និងយុវជនកាកបាទក្រហមកម្ពុជា ចុះសួរសុខទុក្ខដោយផ្ទាល់ និងចែកអំណោយមនុស្សធម៌ជូនអ្នកជំងឺចំនួន ១.១២៣នាក់ ដែលកំពុងសម្រាកព្យាបាលនៅតាមផ្នែកនីមួយៗក្នុងមន្ទីរពេទ្យកាល់ម៉ែត រាជធានីភ្នំពេញ។
ក្នុងឱកាសនោះ លោកជំទាវកិត្តិបណ្ឌិត អ៊ុក ម៉ាលី ក៏បានប្រគល់អំណោយលេីកទឹកចិត្តដល់ គ្រូពេទ្យ បុគ្គលិក និងកម្មករ ចំនួន ១.៦១៧នាក់ ដែលកំពុងបម្រេីការងារនៅក្នុងមន្ទីរពេទ្យផងដែរ៕
