គ្រូជម្រើជាតិវៀតណាម បានលើកឡើងថា ក្រុមកម្ពុជាមានប្រៀបជាងក្រុមរបស់ខ្លួនត្រង់ចំនុច….

ហ្វីលីពីន៖ គ្រូបង្វឹកក្រុមជម្រើសជាតិវៀតណាមលោក Park Hang-seo យល់ឃើញថា ក្រុមជម្រើសជាតិកម្ពុជា ហាក់មានប្រៀបជាងក្រុមរបស់លោក ដោយសារកម្ពុជាមានពេលសម្រាក២ថ្ងៃ ចំណែកឯក្រុមវៀតណាមមានពេលសម្រាកតែមួយថ្ងៃ។

លោក Park Hang-seo បានថ្លែងក្នុងសន្និសីទកាសែតមុនការប្រកួតថ្ងៃស្អែកថា៖

“ប្រកួតថ្ងៃស្អែកជាមួយកម្ពុជា ជាការប្រកួតមួយដ៏មានអត្ថន័យ ហើយវាក៏ជាការលំបាកមួយផងដែរ។ ពួកគេទទួលបានថ្ងៃសម្រាកលើសយើងមួយថ្ងៃ ដូច្នេះកម្លាំងរបស់ពួកគេល្អជាងពួកយើង។ ប៉ុន្តែមិនថ្វីពួកយើងនឹងលេងឲ្យអស់ពីកម្លាំងនិងស្មារតី។”

“ក្នុងពូល A ក្រុមទាំងអស់សុទ្ធតែខ្លាំង។ អត្ថប្រយោជន៍ដែលពួកគេទទួលបានគឺលេងតិចជាងពួកយើង (Group B) មួយប្រកួត តែខ្ញុំមិនចង់បញ្ចេញមតិច្រើនលើរឿងនេះទេ ខ្ញុំគ្រាន់តែចង់ផ្ដោតទៅលើក្រុមកម្ពុជា និងព្យាយាមឱ្យអស់ពីសមត្ថភាព។”

គួររម្លឹកផងដែរថា ក្រុមជម្រើសជាតិកម្ពុជា U-22 នឹងត្រូវធ្វើការប្រកួតជាមួយនឹងក្រុមជម្រើសជាតិវៀតណាម U-22 ក្នុងព្រឹត្តការណ៍ស៊ីហ្គេមលើកទី៣០ វិញ្ញាសារបាល់ទាត់បុរស វគ្គពាក់កណ្ដាលផ្ដាច់ព្រ័ត្រ នៅថ្ងៃស្អែកវេលាម៉ោង៧យប់៕