ល្ងាចនេះអត្តពលិកត្រៀមស៊ីហ្គេមចូលជួបសម្ដេច ហ៊ុន សែន មុនចេញទៅប្រកួតនៅហ្វីលីពីន
ស៊ីហ្គេម៖ មុនចេញទៅប្រកួតក្នុងព្រឹត្តិការណ៍ប្រចាំតំបន់នាពេលឆាប់ៗខាងមុខ សម្ដេចតេជោ ហ៊ុន សែន អនុញ្ញាតឲ្យប្រតិភូ គ្រូបង្វឹក និងកីឡាករ-កីឡាការិនី ៣០ប្រភេទកីឡា ឬស្មើនឹងអត្តពលិកប្រមាណ ៤០០នាក់ដែលត្រៀមចូលរួមប្រកួតកីឡាស៊ីហ្គេមលើកទី៣០ នៅប្រទេសហ្វីលីពីន ចូលជួបសម្ដែងការគួរសម និងសំណេះសំណាលនាវេលាម៉ោង ៤ល្ងាចនេះនៅវិមានសន្តិភាព។
ការអនុញ្ញាតដ៏ខ្ពង់ខ្ពស់បែបនេះ ពោលគឺរាល់ពេលមុនការប្រកួតហ្គេមផ្លូវការ សម្ដេចតែងអញ្ជើញអត្តពលិកកម្ពុជា ចូលជួបសម្ដែងការគួរសមផ្ដល់នូវអនុសាសន៍ និងដំបូន្មានល្អៗជាច្រើន ក្នុងន័យបង្ហាញពីការយកចិត្តទុកដាក់ចំពោះសុខទុក្ខ និងជំរុញលើកទឹកចិត្តដល់កីឡាករ-កីឡាការិនី ដែលជាកាយវិការមួយដ៏ប្រពៃសម្រាប់កីឡាករ-កីឡាការិនីជាតិមុនការប្រកួត។
អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្មកម្ពុជា ក្នុងការត្រៀមចូលរួមការប្រកួតកីឡាស៊ីហ្គេមនៅហ្វីលីពីន ឯកឧត្ដម វ៉ាត់ ចំរើន បានបង្ហាញនូវការអំណរអរគុណចំពោះការឆ្លៀតពេលវេលាដ៏មានតម្លៃ ដើម្បីជួបសំណេះសំណាលជាមួយអត្តពលិកកម្ពុជា ហើយឯកឧត្ដមបានចាត់ទុកការអនុញ្ញាតដ៏ថ្លៃថ្លានេះ នឹងផ្ដល់នូវកម្លាំងពិសេសមួយក្នុងការជំរុញឆន្ទៈ និងស្មារតីប្រកួតប្រជែងរបស់កីឡាករ-កីឡាការិនីកម្ពុជាកាន់តែមានប្រសិទ្ធភាពថែមទៀត។
គួរបញ្ជាក់ថា ចំពោះការប្រកួតកីឡាស៊ីហ្គេមលើកទី៣០ គឺគ្រោងបើកការប្រកួតផ្លូវការនៅថ្ងៃទី៣០ ខែវិច្ឆិកា និងបិទនៅថ្ងៃទី១១ ខែធ្នូខាងមុខនៅប្រទេសហ្វីលីពីន ហើយកម្ពុជាបានត្រៀមបញ្ជូនអត្តពលិក ៣០ប្រភេទកីឡា ស្មើនឹងប្រមាណ ៤០០នាក់ទៅចូលរួម។ លើសពីនេះក៏មានការបញ្ជូនមន្ត្រីពិសេស នៃគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) ដើម្បីសិក្សា និងដកស្រង់បទពិសោធន៍ សម្រាប់ត្រៀមធ្វើម្ចាស់ផ្ទះលើកដំបូងនៅកម្ពុជាផងដែរ៕
