រន្ធត់ណាស់! រថយន្តដឹកខ្សាច់បើកលឿនដូចហោះជ្រុលទៅបុកជាមួយម៉ូតូ ពេញទំហឹងបណ្ដាលឱ្យបុរសម្នាក់បែកក្បាលធ្លាយខួរស្លាប់

(ភ្នំពេញ) ៖ ករណីគ្រោះថ្នាក់ចរាចរណ៍រវាងរថយន្តដឹកខ្សាច់បុកជាមួយម៉ូតូអូសជាច្រើនម៉ែត្រកិនបណ្ដាលឱ្យបុរសម្នាក់បែកក្បាលធ្លាយខួរស្លាប់យ៉ាងអាណោចអធម័។ ហេតុការណ៍នេះកាលម៉ោង៦:២០នាទីល្ងាច ថ្ងៃទី៦ ខែវិឆ្ឆិកាឆ្នាំ២០១៩ នៅតាមបណ្ដោយផ្លូវជាតិលេខ៤ មុខផ្សារមនោរម្យក្នុងសង្កាត់ចោមចៅ៣ ខណ្ឌពោធិ៏សែនជ័យ រាជធានីភ្នំពេញ។
យោងតាមប្រភពពីកន្លែងកើតហេតុបានឱ្យដឹងថា សពជនរងគ្រោះមានឈ្មោះ រីម វុត ភេទប្រុស អាយុ៣៣ឆ្នាំ ស្នាក់នៅភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។ ប្រភពដដែលបន្តថា មុនពេលកើតគេឃើញរថយន្តដឹកខ្សាច់ម៉ាកKIAពណ័ស ស្លាកលេខ ភ្នំពេញ 3C-5139 បើកដោយបុរសម្នាក់ធ្វើដំណើរក្នុងទិសដៅពីលិចទៅកើតបោះពួយយ៉ាងលឿនខណៈមកដល់ចំនុចកើតហេតុខាងលើបានជ្រុលទៅបុកជាមួយម៉ូតូម៉ាកឌ្រីមសង់០១៩ ពណ័ខ្មៅ ស្លាកលខ ភ្នំពេញ1HT-9170 ជិះដោយបុរសម្នាក់ធ្វើដំណើរពីកើតទៅលិចក្នុងបញ្ចាស់ទិសដៅគ្នាបណ្ដាលឲ្យចូលក្រោមរថយន្តកិនចំក្បាលបែកធ្លាយខួរស្លាប់យ៉ាងរន្ធត់បំផុត។ ក្រោយកើតហេតុតៃកុងរថយន្តគេចខ្លួនបាត់ស្រមោល។
ភ្លាមៗនោះសមត្ថកិច្ចមូលដ្ឋានបានចុះមកដល់កន្លែងកើតហេតុបានទាក់ទងជំនាញមកវាស់វែងយករថយន្តបង្ករ និងម៉ូតូរងគ្រោះទៅរក្សាទុកនៅការិយាល័យចរាចរណ៏ផ្លូវគោកស្នងការាជធានីភ្នំពេញរងចាំម្ចាស់រថយន្តចូលខ្លួនមកដោះស្រាយគ្នាតាមផ្លូវច្បាប់
ដោយឡែកសពរងគ្រោះខាងលើក្រោយពីសមត្ថកិច្ចធ្វើកំណត់ហេតុរួចក៏ប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណី៕