យន្តហោះបំបាំងកាយធុន F-35B ចូលរួមក្នុងសមយុទ្ធលើកដំបូងជាមួយយោធាហ្វីលីពីន ខណៈរដ្ឋាភិបាលក្រុងម៉ានីលរិះគន់ចិន
ទាហានហ្វីលីពីននិងអាម៉េរិកសរុបជាង៧.៥០០នាក់ កាលពីថ្ងៃចន្ទទី០១មេសា បានចាប់ផ្តើមសមយុទ្ធយោធាប្រចាំឆ្នាំធំបំផុតរបស់ខ្លួន ចំពេលមានរបាយការណ៍អំពីការទន្ទ្រានរបស់ចិនចូលក្នុងដែនទឹកជុំវិញដែនទឹកកាន់កាប់ដោយហ្វីលីពីននៅក្នុងសមុទ្រចិនខាងត្បូង។
សមយុទ្ធBalikatanឆ្នាំនេះ មានការចូលរួមដោយទាហានហ្វីលីពីន៤.០០០នាក់និងទាហានអាម៉េរិក៣.៥០០នាក់។ទាហានអូស្ត្រាលីមួយក្រុមមានគ្នា៥០នាក់ក៏ចូលរួមផងដែរ។
ក្នុងចំណោមនាវាចម្បាំងអាម៉េរិកដែលចូលរួម រួមមាននាវាUSS Wasp នាវាបុកឡើងច្រាំងមួយនិងយន្តហោះប្រយុទ្ធបំបាំងកាយធុនF-35B ដែលត្រូវបានបញ្ជូនចូលរួមក្នុងសមយុទ្ធជាលើកដំបូង។
សមយុទ្ធBalikatan ដែលនឹងប្រើពេលរហូតដល់ថ្ងៃ១២មេសា ត្រូវបានធ្វើឡើងចំពេលហ្វីលីពីនតវ៉ាខាងការទូតជុំវិញរបាយការណ៍ថា ក្រុមទូកនេសាទនិងនាវាចិនចូលទន្ទ្រានដែនទឹកម្តុំកោះធីទូ( Thitu )នៅចម្ងាយ៤៨០គីឡូម៉ែត្រពីឆ្នេរហ្វីលីពីន។
កងកម្លាំងហ្វីលីពីនបានកាន់កាប់កោះThituចាប់តាំងពីឆ្នាំ១៩៧០។ ជាមួយនឹងទំហំ៣៧ហិកតា វាជាប៉ុស្តិ៍ប៉មជួរមុខធំបំផុតរបស់ហ្វីលីពីននៅក្នុងសមុទ្រចិនខាងត្បូង។ជនស៊ីវិលប្រមាណមួយរយនាក់និងទាហានម៉ារីនមួយក្រុមតូច កំពុងរស់នៅលើនោះ ជាអ្វីដែលអាជ្ញាធរហ្វីលីពីនហៅថា ភូមិដាច់ស្រាយលបំផុតមួយ។
យោធាហ្វីលីពីន បានរាយការណ៍ថា ទូកនេសាទចិនយ៉ាងតិច២០០និងនាវាឆ្មាំមសមុទ្រចិន ត្រូវបានគេប្រទះឃើញនៅជុំវិញកោះនេះ ដោយរារាំងការចូលនេសាទរបស់អ្នកនេសាទហ្វីលីពីន។ក្នុងពេលជាមួយគ្នា អ្នកនាំពាក្យប្រធានាធិបតីហ្វីលីពីន បានប្រាប់អ្នកយកព័ត៌មានកាលពីថ្ងៃចន្ទទី១មេសាថា ក្រសួងការបរទេសបានតវ៉ាប្រឆាំងទៅកាន់ស្ថានទូតចិនរួចហើយ។លោកថា លោកក៏នឹងពិភាក្សាបញ្ហានេះជាមួយឯកអគ្គរដ្ឋទូតចិន។
ក៏មានរបាយការណ៍អំពីការរារាំងរំខានដល់អ្នកនេសាទហ្វីលីពីននៅម្តុំថ្មប៉ប្រះទឹក Scarborough Shoal ដែលជាទីតាំងប្រទាញប្រទង់មួយទៀតរវាងហ្វីលីពីននិងចិន។តែឯកអគ្គរដ្ឋទូតចិនបាននិយាយថា ទាំងចិននិងហ្វីលីពីនបានព្រមព្រៀងរារាំងមិនឲ្យពួកអ្នកនេសាទចូលជិតតំបន់ថ្មប៉ប្រះទឹកនេះទេ។
សូមបញ្ជាក់ថា ចិនបានចូលកាន់កាប់តំបន់ Scarborough នៅឆ្នាំ២០១២ បន្ទាប់ពីនាវាកងទ័ពជើងទឹកហ្វីលីពីនមួយស្ទាក់ចាប់ទូកនេសាទចិន៨គ្រឿងនៅទីនោះ។ក្រោយមកចិនបានបន្ធូរបន្ថយការកាន់កាប់ ខណៈហ្វីលីពីនស្វះស្វែងធ្វើឲ្យទំនាក់ទំនងរបស់ខ្លួនល្អប្រសើរឡើងជាមួយចិន ដោយទូកនេសាទហ្វីលីពីនត្រូវបានអនុញ្ញាតឲ្យចូលទៅតំបន់នោះជាថ្មី៕
អត្ថបទ កែវ ច័ន្ទសុផាវរុណ
