នគរបាលជំនាញពិនិត្យស្រាវជ្រាវ ករណីជនសង្ស័យ២នាក់លួចគាស់ទូរដែកលុយជាង៥ម៉ឺនដុល្លារក្នុងរោងចក្រកាត់ដេរ
(កណ្ដាល)៖នគរបាល នៃស្នងការដ្ឋាននគរបាលខេត្ដកណ្ដាល សហការជាមួយនគរបាលជំនាញក្រុងតាខ្មៅ ធ្វើការពិនិត្យកន្លែងកើតហេតុ និងកសាងសំណុំរឿងដើម្បីស្រាវជ្រាវចាប់ខ្លួនជនសង្ស័យ ក្រោយពីមានករណីជនសង្ស័យ២នាក់ ចូលលួចគាស់ទូរដែក យកលុយជាង៥ម៉ឺនដុល្លារក្នុងរោងចក្រកាត់ដេរ យីហោ មួន តៃ កាលពីវេលាម៉ោង ៤និង២០នាទី ថ្ងៃទី១៨ ខែតុលា ឆ្នាំ២០១៩ ស្ថិតនៅក្នុង ភូមិព្រែកហូរលិច១ សង្កាត់ព្រែកហូរលិច១ ក្រុងតាខ្មៅ ខេត្តកណ្តាល ។
មន្ដ្រីនគរបាលក្រុងតាខ្មៅបានឲ្យដឹងថា៖ ជនសង្ស័យមានគ្នា២នាក់ ភេទប្រុស មិនស្គាល់អត្តសញ្ញាណ អាយុប្រហែល ៣០ឆ្នាំ ពាក់មួកកន្តឹប ពណ៌ស ពាក់ម៉ាស ស្លៀកពាក់ឈុតប៉ារ៉ា (រត់គេចខ្លួន) ។ ចំណែកជនរងគ្រោះជាតំណាងរោងចក្រ ឈ្មោះ លឹម វិញ ភេទប្រុស អាយុ៣៥ឆ្នាំ មានទីលំនៅ ភូមិដើមមាក់ក្លឿ សង្កាត់ច្បារអំពៅ១ ខណ្ឌច្បារអំពៅ រាជធានីភ្នំពេញ មុខរបរ ប្រធានរដ្ឋបាលរោងចក្រ ។ ដោយឡែកទ្រព្យសម្បត្ដិបាត់បង់មាន៖ ប្រាក់ដុល្លារចំនួន ៥០,៥២៣,៤៤ដុល្លារហសរដ្ឋអាមេរិក រីឯសម្ភារៈដកហូតបានមាន៖ ទូរដែកទំហំ៦០សង់ទីម៉ែត្រ គុណ៥០សង់ទីម៉ែត្រចំនួន១ អាវយឺតមនុស្សស្រីដៃវែងចំនួន១៨អាវ ម៉ាឡេតចំនួន១ និងទួណឺវីសចំនួន ១ផងដែរ ។
ប្រភពដដែលបន្ដថា មុនពេលកើតហេតុ ជនរងគ្រោះ ដែលជាតំណាងរោងចក្រ និងខាងគណនេយ្យ បានទុកទូរដែកនៅក្នុងបន្ទប់ ហើយបានចាក់ទ្វារបន្ទប់ត្រឹមត្រូវមុនចេញទៅផ្ទះ ។ លុះដល់វេលាម៉ោង ៥និង១០នាទី ពេលដែលឈ្មោះ យូ រ៉ាន់ ជាបុគ្គលិកផ្នែកបើកបរចូលទៅស្កែនមេដៃដើម្បីបើកឡានដឹកភ្ញៀវរបស់រោងចក្រ ស្រាប់តែឃើញទូរដែក ដែលទុកនៅក្នុងបន្ទប់គណនេយ្យ ចេញមកនៅខាងមុខបន្ទប់ ដោយមានស្នាមគាស់ ភ្លាមនោះ គាត់ក៏បានដើរទៅហៅជនជាតិចិនដែលស្នាក់នៅខាងក្រោយអគាររោងចក្រឲ្យមកមើល និងបានរាយការណ៍ ជូនសមត្ថកិច្ចចុះទៅពិនិត្យឆែកមើលតាម រយ: កាមេរ៉ាសុវត្ថិភាពឃើញជនសង្ស័យ២នាក់ដែលមានភិនភាគដូចខាងលើ បានផ្លោះតាមរបងរោងចក្រផ្នែកខាងជើងចូលទៅធ្វើសកម្មភាពគាស់ទ្វារបន្ទប់អូសទូរដែកចេញមកមុខបន្ទប់ ហើយគាស់យកលុយ រួចគេចខ្លួនបាត់តែម្តង ។
ករណីនេះ កម្លាំងនគរបាលជំនាញបច្ចេកទេសខេត្ត និងកម្លាំងនគរបាលជំនាញយុត្តិធម៌ក្រុងតាខ្មៅ កំពុងបន្តធ្វើការស្រាវជ្រាវ ដើម្បីចាត់ការតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
