ពិតជាឃោឃៅមែន !! គ្រាន់តែរឿង តូចតាចសោះតាមសម្លាប់គ្នាដែល ……!!!!
ខេត្តកំពង់ចាម ៖ ជនសង្ស័យពុំស្គាល់អត្តសញ្ញាណម្នាក់ ប្រដាប់ដោយកាំភ្លើងខ្លី១ដើម បានជិះម៉ូតូដេញតាមបាញ់បុរស២នាក់ បណ្តាលឲ្យរងរបួសទាំង២នាក់ ក្រោយមកបុរសជាជនរងគ្រោះម្នាក់បានស្លាប់ ។ ក្រោយពេលបាញ់ប្រហាររួច ជនសង្ស័យបានរត់គេចខ្លួនបាត់។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកើតឡើងកាលវេលាម៉ោង១២និង៣០នាទីយប់រំលងអធ្រាត្រឈានចូលព្រឹកថ្ងៃទី៣១ មីនា ២០១៩ ត្រង់ចំណុចមុខហាងខារ៉ាអូខេគ្រួសារ ស្ថិតក្នុងភូមិទី២ សង្កាត់វាលវង់ ក្រុងកំពង់ចាម ។
ជនរងគ្រោះទាំង២នាក់ខាងលើ ម្នាក់ឈ្មោះប៊ុន លាង ភេទប្រុស រស់នៅភូមិគគរទី១ ឃុំគគីរ ស្រុកកំពង់សៀម ជាអ្នករួមដំណើរ បានស្លាប់ ចំណែកម្នាក់ទៀតដែលរងរបួសធ្ងន់ឈ្មោះ ឆុន ចិន្តា ភេទប្រុស អាយុ២៥ឆ្នាំ នៅភូមិគគរទី១ ឃុំគគីរ ស្រុកកំពង់សៀម ជាអ្នកបើកបរម៉ូតូមួយគ្រឿងម៉ាកហុងដាឌ្រីម ធុនC125 ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ ភ្នំពេញ ១GS-៧៦៤០ ។
ចំណែកជនសង្ស័យម្នាក់មិនត្រូវបានស្គាល់អត្តសញ្ញាណ ជាអ្នកបើកបរម៉ូតូមួយគ្រឿងម៉ាកហ្សូមមើ ពណ៌ក្រហម ។
តាមប្រភពពីសាក្សីនៅម្តុំកន្លែងកើតហេតុបានប្រាប់ឱ្យដឹងថា នៅយប់ថ្ងៃកើតហេតុ ដំបូងគេបានឮសូរសំឡេងគេបាញ់កាំភ្លើងប្រហែលចំនួន៣គ្រាប់ ត្រង់ចំណុចរង្វង់មូលនាងគង្ហីង បន្ទាប់មកគេឃើញម៉ូតូចំនួន២គ្រឿងបានបើកបរក្នុងទិសដៅពីត្បូងមកជើង ក្នុងល្បឿនលឿនទៀតផង ហើយពេលដែលម៉ូតូទាំង២គ្រឿងបើកបរបានប្រហែលជាង២០០ម៉ែត្រ ស្រាប់តែគេឮសំឡេងផ្ទុះអាវុធចំនួន៣គ្រាប់ទៀត បណ្តាលឲ្យភាគីខាងម៉ូតូមួយគ្រឿងជិះគ្នា២នាក់បានដួល ហើយខ្មាន់កាំភ្លើងបានជិះម៉ូតូត្រឡប់ក្រោយគេចខ្លួនបាត់ ។
តាមប្រភពដដែលបានបន្តថា ក្រោយកើតហេតុបង្កឲ្យមានការភ្ញាក់ផ្អើលដល់ប្រជាពលរដ្ឋដែលនៅក្បែរកន្លែងកើតហេតុបាននាំគ្នាបើកទ្វារផ្ទះចេញមកមើល ហើយកម្លាំងប៉ុស្តិ៍រដ្ឋបាលសង្កាត់វាលវង់ក៏ ប្រញាប់ចុះមកដល់កន្លែងកើតហេតុ និងមានម្លាំងសមត្ថកិច្ចកាន់តែច្រើនឡើង ហើយបានប្រញាប់ដឹកបុរសរងគ្រោះទាំង២នាក់យកទៅសង្គ្រោះនៅមន្ទីរពេទ្យខេត្ត ។ រហូតមកដល់ព្រឹកថ្ងៃទី១ មេសា នគរបាលក្រុងកំពង់ចាមបានបើកការស៊ើបអង្កេតជាបន្តទៀត និងចុះមកសួរនាំប្រជាពលរដ្ឋនៅកន្លែងកើតហេតុ ដើម្បីឈានទៅកំណត់មុខសញ្ញាជនសង្ស័យដែលជាអ្នកបាញ់ប្រហារ ។
តាមប្រភពពីអ្នកស្រី ស៊ន់ ចាន់ណា អាយុ៣៩ឆ្នាំ នៅភូមិគគរទី១ ឃុំគគរ ស្រុកកំពង់សៀម ត្រូវជាប្រពន្ធជនរងគ្រោះដែលស្លាប់បានប្រាប់ឱ្យដឹងថា ប្តីរបស់គាត់ឈ្មោះប៊ុនលាង បានចេញពីផ្ទះកាលពីវេលាម៉ោង៦ល្ងាចថ្ងៃទី៣០មីនា ២០១៩ ដោយទៅផឹកស៊ីនៅផ្ទះឈ្មោះយ៉េ ដែលរស់នៅក្នុងភូមិជាមួយគ្នា បន្ទាប់មកបានបន្តមកផឹកនៅផ្ទះឈ្មោះរីដា នៅជិតផ្ទះទៀតរហូតដល់ជិតកណ្តាលអាធ្រាត្រមិនបានមកចូលផ្ទះដេកទេ ដោយបានជិះម៉ូតូ១គ្រឿងជាមួយនឹងឈ្មោះចិន្តា មកកាន់ក្រុងកំពង់ចាម ។
ប្រភពដដែលបានបន្តថា ស្រាប់តែដល់វេលាកើតហេតុ មានគេទូរស័ព្ទមកប្រាប់គាត់ថា ប្តីត្រូវបានគេបាញ់បណ្តាលឱ្យរងរបួស ត្រង់ម្តុំរង្វង់មូលនាងគង្គីង ឮដូច្នេះគាត់ក៏ប្រញាប់ចេញទៅមើលនៅកន្លែងកើតហេតុ ក៏ឃើញប្តីត្រូវរបួសមែន លុះបានបន្តិចក៏មានរថយន្តសង្គ្រោះមកដឹក ហើយគាត់ក៏បានឡើងជិះជាមួយទៅមន្ទីរពេទ្យខេត្ត ពេលទៅដល់មន្ទីរពេទ្យ គ្រូពេទ្យមិនហ៊ានមើលទេ ព្រោះប្តីរបស់គាត់ត្រូវរបួសធ្ងន់ធ្ងរពេក ក៏បានដឹកតាមរថយន្តសាមុយយកទៅសង្គ្រោះបន្តនៅមន្ទីរពេទ្យកាល់ម៉ែត រាជធានីភ្នំពេញ រហូតដល់វេលាម៉ោងប្រមាណជាង៩ព្រឹកថ្ងៃទី៣១ មីនា ប្តីរបស់គាត់បានស្លាប់ ដោយគ្រូពេទ្យមិនអាចសង្គ្រោះបាន ព្រោះគ្រាប់កាំភ្លើងបានបាញ់ត្រូវថ្លើម និងគ្រឿងក្នុងជាច្រើន។
តាមប្រភពដដែលបានបន្តទៀតថា ក្នុងពេលចេញទៅផឹកស៊ីនោះ ប្តីរបស់គាត់មិនបានឈ្លោះ ឬមានទំនាស់ពាក្យសំដីជាមួយនឹងអ្នកណាម្នាក់នោះទេ បើផឹកស្រវឹងគឺមានគេដឹកមកផ្ទះ ហើយក៏មិនដែលរករឿងប្រពន្ធកូនដែរ ។ គាត់និងប្តីមិនដែលទំនាស់ម្តងណាទេ ចាប់តាំងពីពេលចាប់ដៃគ្នាជាប្តីប្រពន្ធរហូតមានកូនស្រីចំនួន២នាក់ ម្យ៉ាងទៀត បើប្តីរបស់គាត់ផឹកស្រវឹងនៅពេលយប់មកដល់ផ្ទះគឺសង្ងំដេកហើយ ។ ចំពោះករណីដែលប្តីរបស់គាត់ត្រូវបានគេបាញ់ប្រហារត្រូវក្រោមក្លៀកខាងស្តាំ គឺគ្រូពេទ្យបានវះកាត់រកក្បាលគ្រាប់មិនឃើញនោះទេ ហើយករណីនេះគាត់សូមឲ្យសមត្ថកិច្ចគ្រប់លំដាប់ថ្នាក់ មេតា្តស្រាវជ្រាវតាមវែកមុខឃាតករ ដើម្បីនាំខ្លួនមកផ្តន្ទាទោសតាមច្បាប់ និងសងសំណង។
តាមប្រភពពីជនរងគ្រោះឈ្មោះ ឆុន ចិន្តា ដែលកំពុងសម្រាកព្យាបាលនៅមន្ទីរពេទ្យបានប្រាប់ឱ្យដឹងថា ក្រោយពីបានផឹកស៊ីនៅក្នុងភូមិរួចហើយ គាត់បានឌុបឈ្មោះ ប៊ុន លាង ក្នុងគោលបំណងមកហូបបបរសនៅក្បាលស្ពានគីហ្ស៊ុណា ក្រុងកំពង់ចាម តែនៅពេលដែលម៉ូតូរបស់គេបានជិះមកដល់ត្រង់រង្វង់មូលនាងគង្ហីង ក្នុងទិសដៅពីត្បូងមកជើង ស្រាប់តែឃើញបុរសម្នាក់ជិះម៉ូតូមួយគ្រឿងម៉ាក ហ្សូមមើ ពណ៌ក្រហម១គ្រឿង ធ្វើដំណើរស្របទិសគ្នាផងដែរ ។
ប្រភពដដែលបានបន្តថា ពេលនោះគាត់បានបន្ថែមល្បឿនវ៉ាទៅមុខបានប្រហែល១០ម៉ែត្រ ស្រាប់តែបុរសដែលបើកបរម៉ូតូម៉ាកហ្សូមមើនោះបាញ់ប្រហារមកលើពួកគាត់ចំនួន៣គ្រាប់ ដោយមិនដឹងថាត្រូវនោះទេ ហើយគាត់ក៏ប្រឹងបើកបរម៉ូតូមកមុខទៀត ក៏ត្រូវជនមិនស្គាល់អត្តសញ្ញាណនោះតាមបាញ់ចំនួន២គ្រាប់ទៀតសរុបបាញ់៥គ្រាប់ ដែលជាហេតុបណ្តាលឲ្យត្រូវអ្នកជិះខាងក្រោយរងរបួសធ្ងន់ ចំណែកគាត់ត្រូវ១គ្រាប់ចំគូទខាងស្តាំបៀមក្បាលគ្រាប់ ហើយមកដល់ព្រឹកថ្ងៃទី១ មេសា នេះត្រូវបានគ្រូពេទ្យខេត្តបានវះកាត់យកចេញហើយ ។ ពេលដែលផឹកស៊ីនៅក្នុងភូមិ ពួកគាត់មិនមានទំនាស់ជាមួយនឹងអ្នកណាម្នាក់នោះទេ ហើយកាលពីមុនក៏គ្មានដែរទៀត គាត់មានចង្ងល់ថា ការបាញ់ប្រហារខាងលើ សង្ស័យតែឃាតករខឹងគាត់ជិះម៉ូតូវ៉ាទេដឹង?
តាមប្រភពពីសមត្ថកិច្ចបានឱ្យដឹងថា ដោយមានបញ្ជាពីលោកស្នងការនគរបាលខេត្តនោះ សមត្ថកិច្ចគ្រប់លំដាប់ថ្នាក់បានកំពុងតែដុតដៃដុតជើងចុះស្រាវជ្រាវករណីនេះ ហើយក្នុងជំហានដំបូងក៏បានលើកហេតុផលថា ការប្រហារនេះគឺដោយសារតែខឹងជនរងគ្រោះជិះម៉ូតូវ៉ា នេះបើតាមការបំភ្លឺរបស់ជនរងគ្រោះខាងលើ។
តាមប្រភពដដែលបានបន្តថា ឃាតករប្រើប្រាស់អាវុធខ្លីមិនស្គាល់ម៉ាក បានបាញ់ជនរងគ្រោះម្នាក់ត្រូវ១គ្រាប់ត្រង់ឆ្អឹងជំនីរខាងស្តាំ បណ្តាលឱ្យស្លាប់ ហើយតាមរយៈការឆែកកាមេរ៉ាសុវត្ថិភាពបានឃើញជនសង្ស័យជិះម៉ូតូម៉ាកហ្សូមមើដេញតាមបាញ់ប្រហារមកលើជនរងគ្រោះមានគ្នា២នាក់ បន្ទាប់មកពីកើតហេតុ ជនសង្ស័យបានជិះម៉ូតូត្រឡប់ក្រោយគេចខ្លួនបាត់ ។ រហូតមកដល់រសៀលថ្ងៃទី១ មេសា សមត្ថកិច្ចនៅមិនទាន់កំណត់បានមុខសញ្ញាឃាតករនៅឡើយទេ ៕
អត្ថបទ កែវ ច័ន្ទសុផាវរុណ
