កម្លាំងចម្រុះឆ្មក់ចូលបង្ក្រាបផ្ទះជួញដូរផ្លូវភេទមួយកន្លែងជារបស់ជនជាតិវៀតណាម ឃាត់ខ្លួនបាន៦នាក់
ខេត្តប៉ៃលិន ៖ កម្លាំងចម្រុះនៃស្នងការដ្ឋាននគរបាលខេត្តប៉ៃលិន ចុះបង្ក្រាបករណីជួញដូរផ្លូវភេទខុសច្បាប់មួយកន្លែងនៅចំណុចផ្ទះរបស់ឈ្មោះ សុខ ស្រីលីន ភេទស្រី ជាជនជាតិវៀតណាម និងធ្វើការឃាត់ខ្លួនបានជនសង្ស័យប្រុសស្រីចំនួន៦នាក់ផងដែរ ។ ប្រតិបត្តិការចុះបង្ក្រាបនេះដឹកនាំផ្ទាល់ពីលោក តូច សុភក្តី ព្រះរាជអាជ្ញាអមសាលាដំបូងខេត្តប៉ៃលិន និងលោកឧត្ដមសេនីយ៍ត្រី ស៊ិន សុភាលក្ម្សី ស្នងការរងផែនការងារគ្រប់គ្រងអាវុធគ្រឿងផ្ទុះ និងអគ្គីភ័យ ។
ជនសង្ស័យដែលឃាត់ខ្លួនទាំង៦នាក់ខាងលើរួមមាន ១- ឈ្មោះ សុខ ស្រីលីន ភេទស្រី អាយុ៣៥ឆ្នាំ ជនជាតិវៀតណាម ជាម្ចាស់ផ្ទះ ២-ឈ្មោះ វៀង ធីហុង ហៅរក្សា ភេទស្រី អាយុ២៥ឆ្នាំ ជនជាតិវៀតណាម ៣-ឈ្មោះ ធិន ណាវ៉ាន់ ហៅអាម៉ី ភេទស្រី អាយុ២២ឆ្នាំ ជនជាតិវៀតណាម ៤- ឈ្មោះ ថៃ នីតៃលិន ភេទស្រី អាយុ២៧ឆ្នាំ ជនជាតិវៀតណាម ៥- ឈ្មោះ ម៉ៃទ្រី ថាណាផាសាត់ថាណា (ហៅ ម៉ៃទី) ភេទប្រុស អាយុ៤៥ឆ្នាំ ជនជាតិថៃ មុខរបរគ្រូពេទ្យ និង៦-ឈ្មោះ ឆាត ឡុង ភេទប្រុស អាយុ៣១ឆ្នាំ ជនជាតិខ្មែរ មុខរបរសន្តិសុខ ។ បច្ចុប្បន្នជនសង្ស័យទាំង៦នាក់ខាងលើស្នាក់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ក្នុងប្រតិបត្តិការនេះ កម្លាំងជំនាញបានធ្វើការឆែកឆេររកឃើញស្រោមអនាម័យមួយចំនួននៅក្នុងកាបូបរបស់ជនសង្ស័យ និងស្រោមអនាម័យដែលប្រើប្រាស់រួចនៅក្នុងធុងសំរាមសរុបចំនួន១០ស្រោម។
បច្ចុប្បន្ន ជនសង្ស័យទាំង៦នាក់ខាងលើត្រូវបាននគរបាលឃាត់ខ្លួនបញ្ជូនទៅការិយាល័យប្រឆាំងការជួញដូរ និងការពារអនីតិជន ដោយធ្វើការកសាងសំណុំរឿង ដើម្បីចាត់ការតាមនីតិវិធី ៕
