ព្រឹកនេះ លោក ពេជ្រ ស្រស់ បានដាក់លិខិតអញ្ជើញ លោកវ៉ា គឹមហុង ឆ្លើយបំភ្លឺអំពីកិច្ចការព្រំដែនរួចរាល់ហើយ

ភ្នំពេញ៖ ដូចការគ្រោងទុកក្នុងនាមឧត្តមក្រុមប្រឹក្សាពិគ្រោះ និងផ្តល់យោបល់ លោក ពេជ្រ ស្រស់ ប្រធានគណបក្សយុវជនកម្ពុជា នៅព្រឹកថ្ងៃទី៨ ខែតុលា ឆ្នាំ២០១៩នេះបានដាក់លិខិតអញ្ជើញ លោកទេសរដ្ឋមន្រ្តី វ៉ា គឹមហុង ប្រធានអាជ្ញាធរជាតិទទួលបន្ទុកកិច្ចការព្រំដែន ដើម្បីបំភ្លឺជូនឧត្តមក្រុមប្រឹក្សាពិគ្រោះ និងផ្តល់យោបល់ អំពីកិច្ចការព្រំដែន រួចរាល់ហើយ។

ការដាក់នេះក្រោយលោក ពេជ្រ ស្រស់ បានសរសេរនៅក្នុងទំព័រហ្វេសបុករបស់លោក នៅថ្ងៃទី០៨ ខែតុលា ឆ្នាំ២០១៩នេះ យ៉ាងដូច្នេះថា៖ «ខ្ញុំនឹងអញ្ជើញ ឯកឧត្តម វា គឹមហុង ដើម្បីបកស្រាយអំពីកិច្ចការព្រំដែនជាពិសេសកិច្ចការបោះបង្គោលព្រំដែនកម្ពុជា វៀតណាម និងប្រទេសជិតខាងមួយចំនួនទៀត ហើយការបកស្រាយរបស់ ឯកឧត្តម វា គឹមហុង នឹងធ្វើឡើងចំពោះមុខយន្តការឧត្តមក្រុមប្រឹក្សាពិគ្រោះ និងផ្តល់យោបល់»។

សូមបញ្ជាក់ថា កាលពីសប្តាហ៍មុននេះ កម្ពុជា-វៀតណាម បានចុះកិច្ចព្រមព្រៀងចំនួន២ រួមមាន (១)៖ សន្ធិសញ្ញាបំពេញបន្ថែមលើសន្ធិសញ្ញាកំណត់ ព្រំដែនរដ្ឋឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម និង (២)៖ ពិធីសារខណ្ឌសីមា និងបោះបង្គោលព្រំដែនគោក រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។

កម្ពុជា និងវៀតណាម មានព្រំដែនគោកជាមួយគ្នាប្រវែងប្រមាណ ១,២៧០គីឡូម៉ែត្រ ដោយយោងទៅតាមការកំណត់ក្នុងផែនទីបោនខ្នាត១ លើ១០០ពាន់ ដែលបន្សល់ទុកពីសម័យអាណានិគម និងបានតម្កល់ទុកនៅអង្គការសហប្រជាជាតិ។ ការបោះបង្គោលព្រំដែននៃប្រទេសទាំងពីរ បានចាប់ផ្តើមធ្វើឡើងតាំងពីឆ្នាំ២០០៥មក ដែលរហូតមកដល់ពេលបច្ចុប្បន្នការបោះបង្គោលព្រំដែននេះ សម្រេចបានប្រមាណ ៨៤ភាគរយផងដែរ៕