នៅព្រឹកនេះរដ្ឋសភាបន្តកិច្ចប្រជុំរបស់ខ្លួនបន្ត ពិភាក្សាលើរបៀបវារៈចំនួន ៣ទៀត
(ភ្នំពេញ)៖ យោងតាមសេចក្តីប្រកាសព័ត៌មានរបស់អគ្គលេខាធិការរដ្ឋសភា បានអោយដឹងថា នៅថ្ងៃទី០៨ ខែតុលា ឆ្នាំ២០១៩នេះ រដ្ឋសភានឹងបន្តសម័យប្រជុំលើកទី៣ នីតិកាលទី៦ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា។
បើយោងតាមសេចក្តីប្រកាសព័ត៌មានបានបញ្ជាក់ថា កាលពីព្រឹកថ្ងៃទី៧ ខែតុលា ឆ្នាំ២០១៩ម្សិលមិញ រដ្ឋសភា បានអនុម័តសេចក្តីព្រាងច្បាប់ស្តីពី សំណង់ មាន ២២ជំពូក និង ១១១មាត្រា ចប់សព្វគ្រប់ហើយ។
កិច្ចប្រជុំនាព្រឹកនេះ រដ្ឋសភានឹងបន្តពិភាក្សាលើរបៀបវារៈចំនួន ៣ទៀត គឺអនុម័តលើ(១)សេចក្តីព្រាងច្បាប់ស្តីពី ពាណិជ្ជកម្មតាមប្រព័ន្ធអេឡិចត្រូនិក,(២)សេចក្តីព្រាងច្បាប់ស្តីពី កិច្ចការពារអ្នកប្រើប្រាស់ និង(៣)សេចក្តីព្រាងច្បាប់ស្តីពី របបសន្តិសុខសង្គម៕
អត្ថបទ៖ សុខ លាភ
