លោក សម រង្ស៊ី ប្រាប់ទៅលោក ហ៊ុន សែន ថា បើចាប់ពលរដ្ឋ ដែលមកទទួលលោក ត្រូវរៀបចំមន្ទីរឃុំឃាំងដាក់ពលរដ្ឋយ៉ាងតិច១លាននាក់
ខ្ញុំ សម រង្ស៊ី ចង់ប្រាប់ទៅលោក ហ៊ុន សែន វិញ ថា បើគាត់ចង់ធ្វើតាមការគំរាមកំហែងរបស់គាត់មែននោះ គាត់ត្រូវតែរៀបចំមន្ទីរឃុំឃាំងសម្រាប់ដាក់ពលរដ្ឋខ្មែរ យ៉ាងតិចមួយលាននាក់ ដែលនឹងមកទទួលស្វាគមន៍រូបខ្ញុំ នៅលើទឹកដីប្រទេសកម្ពុជា ក្នុងថ្ងៃ ០៩ វិច្ឆិកា ២០១៩។ នេះជាការលើកឡើងរបស់លោកសម រង្ស៊ី ក្នុងទំព័រហ្វេសបុករបស់លោកនៅល្ងាចថ្ងៃទី៣ ខែតុលានេះ ដើម្បីឆ្លើយតបទៅ ហ៊ុន សែន ដែលគំរាមចាប់ឃុំឃាំងពលរដ្ឋ ដែលនឹងមកទទួលស្វាគមន៍រូបលោក។
សម រង្ស៊ី បន្ថែមថា បើលោក ហ៊ុន សែន រៀបចំមន្ទីរឃុំឃាំងបែបនេះមិនបានទេ គាត់ត្រូវតែត្រៀមខ្លួនចូលគុកតែម្នាក់គាត់ចុះ។ សម័យនេះ មិនអាចធ្វើដូចសម័យខ្មែរក្រហមបានទេ គឺសម័យដែលលោក ប៉ុល ពត ចាប់ប្រជារាស្ត្រខ្មែរទាំងមូល ដាក់ក្នុងគុកឥតជញ្ជាំង នៅលើទូទាំងប្រទេសកម្ពុជា។
លោក អំ សំអាត នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ (Licadho) ប្រាប់ VOA ថា សម្រាប់ករណីលោក សម រង្ស៊ី គឺត្រូវបានរដ្ឋាភិបាលមានវិធានការខ្លាំងដោយសារជាប់ពាក់ព័ន្ធនឹងនយោបាយ។
«ក្នុងនាមជាពលរដ្ឋខ្មែរមួយដែរ យើងគ្រាន់តែចង់ឃើញអ្នកនយោបាយទាំងអស់ហ្នឹងគាត់ងាករកតុចរចាគ្នាទៅដើម្បីគិតអំពីឧត្តមប្រយោជន៍ជាតិ ឧត្តមប្រយោជន៍ប្រជាពលរដ្ឋជាធំ យើងកុំគិតអំពីផលប្រយោជន៍នៃអំណាច ឬក៏ផលប្រយោជន៍នយោបាយជាធំ»។
ពលករខ្មែរម្នាក់ដែលកំពុងធ្វើការនៅទីក្រុងបាងកក លោក ជីម ផាត ថ្លែងថា ពលករខ្មែរនៅប្រទេសថៃរាប់ម៉ឺននាក់ ត្រៀមលុយកាក់វិលត្រឡប់ទៅកម្ពុជាជាមួយលោក សម រង្ស៊ី ដើម្បីស្ដារមុខមាត់របស់ប្រទេសឱ្យល្អឡើងវិញនៅលើឆាកអន្តរជាតិ៖ «ខ្ញុំមើលឃើញនេះគឺគណបក្សប្រជាជនព្យាយាមទប់ស្កាត់គ្រប់ស្ថានភាព និងគ្រប់ស្ថានការណ៍ទាំងអស់ គាត់ខ្លាចពលរដ្ឋច្រើនទៅទទួលលោក សម រង្ស៊ី ។យើងដឹងថាកាលបីឆ្នាំ២០១៣កន្លងមកមានព្រឹត្តិការណ៍ទទួលស្វាគមន៍លោក សម រង្ស៊ី យ៉ាងចាស់ដៃ ហើយខ្ញុំជឿជាក់ថានៅថ្ងៃទី៩វិច្ឆិកា ប្រជាពលរដ្ឋទាំងក្នុងនិងក្រៅស្រុកនាំគ្នាទទួលលោក សម រង្ស៊ី យ៉ាងច្រើនកុះករ ហើយពេលនោះគណបក្សប្រជាជនមិនអាចទប់នឹងកម្លាំងពលរដ្ឋបានទេ»។
លោក សម រង្ស៊ី បានភៀសខ្លួនទៅក្រៅប្រទេសចាប់តាំងពីឆ្នាំ២០១៥មក ក្រោយពីលោកទទួលរងបណ្តឹងចោទប្រកាន់ជាច្រើនករណីពីសំណាក់មន្រ្តីរដ្ឋាភិបាលកម្ពុជា។ រហូតមកទល់ពេលនេះលោកជាប់បណ្តឹងចំនួនប្រមាណដប់បណ្តឹង ពីលោកនាយករដ្ឋមន្ត្រីហ៊ុន សែន ពីលោកហេង សំរិន ប្រធានរដ្ឋសភា លោក ហោ ណាំហុង អតីតរដ្ឋមន្រ្តីក្រសួងការបរទេស និងបណ្តឹងពីលោកស ខេង រដ្ឋមន្រ្តីក្រសួងមហាផ្ទៃ។ តុលាការកម្ពុជាបានកោះហៅលោក សម រង្ស៊ី ជាថ្មីទៀត ឲ្យចូលខ្លួននៅថ្ងៃដើមខែតុលាខាងមុខ៕
អត្ថបទ៖ សុខ លាភ
