លីគកម្ពុជាសប្តាហ៍ទី២សរុបគ្រាប់បាល់ទាំងអស់មាន២៨គ្រាប់
ថ្ងៃទី ០១ ខែមេសា ឆ្នាំ ២០១៩ ម៉ោង 12:20PM
សប្តាហ៍ទី២នៃលីគកំពូលកម្ពុជារដូវកាល២០១៩នេះបានបញ្ចប់ដោយមានការប្រកួតចំនួន៧គូដែលធ្វើឲ្យមានគ្រាប់បាល់ធ្លាយសំណាញ់ទីគ្នារហូតដល់២៨គ្រាប់។
៣គូកាលពីថ្ងៃសៅរ៍ ទី៣០ មីនា មានគ្រាប់បាល់១៣គ្រាប់ក្នុងនោះអគ្គស្នងការដ្ឋាននគរបាលជាតិបានយកឈ្នះអាស៊ីអឺរ៉ុបដោយលទ្ធផល ៣-២។ ម្ចាស់ផ្ទះវិសាខាបានយកឈ្នះគីរីវង់សុខសែនជ័យដោយលទ្ធផល ២-០ និង ក្រុមក្រសួងការពារជាតិបានយកឈ្នះក្រុមណាហ្គាវើលដោយលទ្ធផល ៤-២។
ចំពោះ៤គូកាលពីថ្ងៃអាទិត្យ ទី៣១ មីនា ម្សិលមិញមានគ្រាប់បាល់កើតឡើង១៥គ្រាប់គឺអគ្គិសនីកម្ពុជាឈ្នះបឹងកេត ១-០។ សូលទីឡូអង្គរចាញ់ព្រះខ័នរាជស្វាយរៀង ០-១។ យុវជនបាទីចាញ់ភ្នំពេញក្រោន ០-១ ហើយអង្គរថាយហ្គ័របានធ្វើដំណើរទៅលត់ក្រុមកំពង់ចាមដោយលទ្ធផល ១១-០។
អ្វីដែលគួរឲ្យកត់សំគាល់នោះគឺ ក្រុមខ្លាំងបឹងកេតបែរជាភ្លាត់ចាញ់អគ្គិសនីដោយលទ្ធផល ១-០ បើទោះជាអគ្គិសនីកម្ពុជានៅសល់សមាជិកតែ១០នាក់ បន្ទាប់ពីកាតក្រហមម្នាក់នៅវគ្គទី២។ ការប្រកួតនេះបឹងកេតបានសម្រុកយ៉ាងខ្លាំង និងគ្រប់គ្រងបាល់ពាក់កណ្តាលតារាងទំាងវគ្គទី១ និងវគ្គទី២ ប៉ុន្តែគ្មានសំណាង ខណៈម្ចាស់ផ្ទះមានឱកាសវាយបកដាច់មាត់តែម្តងក៏ស៊ុតចូលបានសម្រេច៕
អត្ថបទ ៖ ពេជ្រ គឹមស្រ៊ិន
