លោក ពេជ្រ ស្រស់ ថា ការស្នើឲ្យកម្ពុជារៀបចំការបោះឆ្នោតឃុំ-សង្កាត់ ឡើងវិញ របស់លោកស្រី រ៉ូណា ស្មីត វាជារឿងអស់សំណើច
ភ្នំពេញ៖ បន្ទាប់ពីលោកស្រី រ៉ូណា ស្មីត អ្នករាយការណ៍ពិសេសស្ដីពីស្ថានភាពសិទ្ធិមនុស្សប្រចាំកម្ពុជា នៅថ្ងៃទី២៥កញ្ញាម្សិលមិញ បានស្នើឲ្យកម្ពុជារៀបចំការបោះឆ្នោតឃុំ-សង្កាត់ ឡើងវិញ ប្រធានបក្សយុវជនកម្ពុជា ថាការស្នើនេះជារឿងគួរអោយអស់សំណើច ។
តាមរយៈទំព័រហ្វេសបុក លោក ពរជ្រ ស្រស់ បានលើកឡើងថា វាគឺជារឿងអស់សំណើចខ្លាំងណាស់ ដែលមន្រ្តីអង្គការអន្តរជាតិធ្វើការងារលំដាប់ពិភពលោក ១ រូប បានស្នើឲ្យប្រទេសកម្ពុជាធ្វើការបោះឆ្នោតជ្រើសរើសក្រុមប្រឹក្សាឃុំឡើងវិញនោះ ។
លោកថា ស្របពេល ដែលប្រទេសកម្ពុជា បានធ្វើការបោះឆ្នោតហួស២ដំណាក់កាលហើយដែរ ដោយហួសនូវដំណាក់កាលទី១គឺការបោះឆ្នោតជ្រើសរើសសមាជិកព្រឹទ្ធសភានិងហួសដំណាក់កាលទី២គឺការបោះឆ្នោតជ្រើសរើសសមាជិក
រដ្ឋសភា(ជ្រើសរើសតំណាងរាស្រ្ត)។
ប្រមុខបក្សរូបនេះបន្ថែមថា វាជារឿងមិនអាចទៅរួចនោះទេ ដែលគាស់ខ្មោចឲ្យងើបឡើងមក ស៊ីបាយផឹកស៊ី ច្រៀង រាំ នៅពេលដែលសាកសពខ្មោចកំពុងត្រូវបានដង្កូវរុកសាច់និងស្អុយរលួយនោះ ។
ជាមួយគ្នានេះដែរ លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ដ្រី ចាត់ទុកការលើកឡើងរបស់លោកស្រីស្មីត ថា ជាការឈ្លានពាន និងជ្រៀតជ្រែកដល់កិច្ចការកម្ពុជា។ ការទាមទារឲ្យមានការបោះឆ្នោតឃុំសង្កាត់នេះ បានបង្ហាញពីនិន្នាការនយោបាយហួសពីកិច្ចទទួលខុសត្រូវនិងកាតព្វកិច្ចរបស់មន្ដ្រីតំណាងអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា។ និងថា លោកស្រី រ៉ូណា ស្មីត គួរតែពង្រឹងភាពជាដៃគូជាមួយរដ្ឋាភិបាល ជាជាងដើរតួនាទីជាតុលាការអត្តនោម័ត ឬជា អ្នកនយោបាយគ្រប់គ្រងជោគវាសនារបស់ពលរដ្ឋខ្មែរ។
សូមរំឭកជូនបន្តិចថា នៅក្នុងការបោះឆ្នោតឃុំ-សង្កាត់ឆ្នាំ២០១៧ គណបក្សសង្គ្រោះជាតិដែលកាលណោះមិនទាន់ត្រូវតុលាការកំពូលរំលាយចោល បានទទួលសំឡេងឆ្នោតគាំទ្រច្រើនលំដាប់ទី២ បន្ទាប់ពីគណបក្សប្រជាជនកម្ពុជា ដោយទទួលបានអាសនៈជាង៥ពាន់។ ប៉ុន្តែក្រោយមក នៅពេលតុលាការកំពូលរំលាយគណបក្សសង្គ្រោះជាតិនៅចុងឆ្នាំ២០១៧ អាសនៈទាំងអស់របស់គណបក្សនេះ ត្រូវបានយកទៅបែងចែកឲ្យគណបក្សដទៃ។ ក្នុងនោះ គណបក្សប្រជាជនគ្រប់គ្រងអាសនៈក្រុមប្រឹក្សាឃុំសង្កាត់របស់អតីតគណបក្សសង្គ្រោះជាតិស្ទើរតែទាំងស្រុង តាមពីក្រោយដោយគណបក្សហ្វ៊ុនស៊ិនប៉ិច និងគណបក្សតូចៗចំនួន៥ទៀត៕
អត្ថបទ៖ សុខ លាភ
