លោក គឹម សន្តិភាព ៖ អយ្យការ និងសមត្ថកិច្ច មានភារកិច្ចបំផ្លាញ ត្រៀមកម្ទេចចោលនូវការប៉ុនប៉ងធ្វើរដ្ឋប្រហាររបស់លោក សម រង្ស៊ី

(ភ្នំពេញ)៖ អ្នកនាំពាក្យក្រសួងយុត្តិធម៌ លោក គឹម សន្តិភាព បានអោយដឹងថា អយ្យការ និងសមត្ថកិច្ចគ្រប់ថ្នាក់ មានកាតព្វកិច្ចបំផ្លាញ និងកម្ទេចចោលនូវសកម្មភាពប៉ុនប៉ងធ្វើរដ្ឋប្រហាររបស់លោក សម រង្ស៊ី និងបក្សពួក។ នេះបើយោងតាមបណ្តាញព័ត៌មាន Fresh News នៅថ្ងៃទី២៣ ខែកញ្ញា ឆ្នាំ២០១៩នេះ។

លោក គឹម សន្តិភាព ថា ឆ្លងតាមរយៈសកម្មភាព និងភស្តុតាងជាបន្តបន្ទាប់ បានបង្ហាញឱ្យឃើញច្បាស់ថា សកម្មភាពរបស់លោក សម រង្ស៊ី និងបក្សពួកខ្លួន បានឈានចូលដល់ផែនការផ្តួលរំលំរបបរាជានិយមដែលមានអង្គព្រះមហាក្សត្រគ្រងរាជសម្បត្តិនាពេលបច្ចុប្បន្ន និងផ្តួលរំលំរាជរដ្ឋាភិបាលស្របច្បាប់នាពេលបច្ចុប្បន្ននេះ ដែលនេះជាសកម្មភាពប៉ុនប៉ងធ្វើរដ្ឋប្រហារមួយយ៉ាងពិតប្រាកដ។

អំពើខាងលើនេះ គឺជាការប្រឆាំងនឹងរដ្ឋធម្មនុញ្ញ និងច្បាប់នៃកម្ពុជាយ៉ាងធ្ងន់ធ្ងរ ដែលកំណត់បានជាបទឧក្រិដ្ឋ ត្រូវផ្តន្ទាទោសក្នុងបទឧក្រិដ្ឋធ្ងន់ធ្ងរអាចអស់មួយជីវិត តាមក្រមព្រហ្មទណ្ឌនៃព្រះរាជាណាចក្រកម្ពុជា! ហេតុនេះ ស្ថាប័នមានសមត្ថកិច្ចគ្រប់លំដាប់ថ្នាក់ រួមទាំងស្ថាប័នអយ្យការ មានកាតព្វកិច្ចអនុវត្តច្បាប់យ៉ាងតឹងរឹង ដើម្បីបំផ្លាញ និងកម្ទេចចោលនូវរាល់ផែនការ និងអង្គការចាត់តាំងទាំងឡាយណាដែលគាំទ្រសកម្មភាពខុសច្បាប់នេះ»។ នេះបើតាមការបញ្ជាក់របស់ អ្នកនាំពាក្យក្រសួងយុត្តិធម៌។

សូមបញ្ជាក់ថា លោក សម រង្ស៊ី មេក្រុមឧទ្ទាមដែលកំពុងប៉ុនប៉ងផ្តួលរំលំរាជរដ្ឋាភិបាលស្របច្បាប់កម្ពុជា បានបន្តប្រមាថដល់ចេស្តាអង្គព្រះមហាក្សត្រ ជាទីគោរពសក្ការៈដ៏ខ្ពង់ខ្ពស់របស់រាស្រ្តខ្មែរកាន់តែខ្លាំងក្លាពីមួយថ្ងៃទៅមួយថ្ងៃ បន្ទាប់ពីប្រកាសវិលចូលប្រទេសដេីម្បីផ្តួលរំលំរាជរដ្ឋាភិបាល ដោយមិនខ្លាចញញេីតច្បាប់នោះទេ៕

អត្ថបទ៖ សុខ លាភ