ស្នងការរងខេត្តបាត់ដំបង នឹងបក្សពួក រងការចោទថា បានស៊ីដាច់លុយខ្មោចមន្រ្តីនគរបាល់អស់រាប់រយលានរៀល
លោកឧត្តមសេនីយត្រី សៅ សាម៉ុន ស្នងការរង និងជាប្រធានផែនធនធានមនុស្ស នៃស្នងការនគរបាលខេត្តបាត់ដំបង នឹងលោកវរសេនីយ៍ទោ វេ គឹមស៊ីម នាយការិយាល័យបុគ្គលិក រងការចោទថា បានស៊ីដាច់លុយខ្មោចមន្រ្តីនគរបាល់អស់រាប់រយលានរៀល។ ការចោទនេះ ធ្វើឡើងបន្ទាប់ពីមានក្រុមគ្រួសារអតីត មន្ត្រីនគរបាលរដ្ឋមួយរូបបាទទួលប្រាក់បៀវត្សរ៍ ក្រោយពីស្វាមីរបស់ខ្លួនបានទទួលមរណៈភាព ។
ប្រភពពីមន្ត្រី នៃស្នងការនគរបាលខេត្តបាត់ដំបង ដែលសុំមិនបញ្ចេញឈ្មោះ បានឱ្យដឹងថា លោកវរសេនីយ៍ទោ វេ គឹមស៊ីម នាយការិយាល័យបុគ្គលិក នឹងលោកឧត្តមសេនីយត្រី សៅ សាម៉ុន ស្នងការរង និងជាប្រធានផែនធនធានមនុស្ស នៃស្នងការនគរបាលខេត្តបាត់ដំបង បានឃុបឃិតគ្នាស៊ីដាច់ប្រាក់សមាគមមិត្តប៉ូលីស ឬថវិកាឧបត្ថម្ភជាច្រើននាក់ មិនតិចជាង២០០ ទៅ៣០០ លានរៀលនោះទេ ។
ប្រភពដដែលឱ្យដឹងទៀតថា នាយការិយាល័យបុគ្គលិក ឃុបឃិតគ្នានឹងលោកឧត្តមសេនីយត្រី សៅ សាម៉ុន ស្នងការរង រួមដៃគ្នា កិបកេងថវិកាជាតិ ដោយគ្មានមន្ត្រីថ្នាក់ក្រោមណា ហ៊ានក្អកជាមួយឡើយ ហើយក៏គ្មានខាងអធិការកិច្ចណាចុះទៅត្រួតពិនិត្យអ្វីដែរ ។
យោងតាមប្រភពពីក្រុមគ្រួសារជនរងគ្រោះ នៃគ្រួសារសព នឿន ខ្លី នៅឃុំព្រៃខ្ពស់ ស្រុកបវេល ដែលរងអយុត្តិធម៌ហើយបង្ហោះតាមគណនីទំព័រហ្វេសបុករបស់ខ្លួន បានប្រាប់ fast news ថា ក្រោយគាត់បង្ហោះភាពអយុត្តិធម៌រឿងបាត់ប្រាក់ខែប្តី ខាងការិយាល័យបុគ្គលិក និងលោកស្នងការរងសៅ សាម៉ុន បានដោះស្រាយឲ្យ២លានរៀលសិន និងសុំពន្យាពេល១០ថ្ងៃទៀត ដើម្បីសង់បង្រ្គប់ឲ្យ នឿន ខ្លី ចំនួន១១ ៣៣៩ ០០០រៀល រយៈពេល៩ខែ។
ជំវិញការចោទប្រកាន់នេះ fast news មិនទាន់អាចទាក់ទងលោកវរសេនីយ៍ទោ វេ គឹមស៊ីម នាយការិយាល័យបុគ្គលិក នឹងលោកឧត្តមសេនីយត្រី សៅ សាម៉ុន ស្នងការរង និងជាប្រធានផែនធនធានមនុស្ស ដើម្បីបំភ្លឺ ឆ្លើយតបទៅហ្នឹងការចោទប្រកាន់នេះនៅឡើយទេ។
គួររម្លឹកថា ការទម្លាយរឿងរ៉ាវនេះ ផ្ទុះឡើងស្របពេលរាជរដ្ឋាភិបាល ធ្វើកំណែរទម្រង់លុបបំបាត់អំពើពុករលួយ ដោយអនុវត្តអភិក្រមទី៥ គឺវះកាត់ទៅលើមន្រ្តី នៃក្រសួងស្ថាប័នមួយចំនួន។ គេសង្ឃឹមថា ក្រោយបែកធ្លាយដំណឹងនេះ អង្គភាពប្រឆាំងអំពើពុករលួយ(ACU) នឹងចុះស៊ើបអង្កេត ដើម្បីដឹងច្បាស់ថា ករណីនេះ ជាក់ស្តែងទៅជាបែបណា?៕
អត្ថបទ៖ សុខ លាភ
