លោក សម រង្ស៊ី បញ្ជាក់ជំហរថា ១០០ភាគរយ គឺមកកម្ពុជា
(ភ្នំពេញ)៖ លោកសមរង្ស៊ី បានប្រកាសជាថ្មីថា ១០០ ភាគរយ គឺលោក នឹងវិលត្រឡប់មកកម្ពុជា តាមការគ្រោងទុក នៅថ្ងៃទី០៩ ខែវិច្ឆិកា ឆ្នាំ២០១៩ ដោយមិនប្រែប្រួលទេ។ ការប្រកាសនេះ បានធ្វើឡើង ខណៈដែលសមត្ថកិច្ចរាជរដ្ឋាភិបាលកម្ពុជា នឹង «ចាប់ សម រង្ស៊ី ១០០ភាគរយ ញាត់គុក»។
ថ្លែងក្នុងពេលជួបជាមួយអ្នកគាំទ្រ នៅទីក្រុងប៉ារីស ប្រទេសបារាំង កាលពីថ្ងៃទី០៨ ខែកញ្ញា ឆ្នាំ២០១៩ លោកសម រង្ស៊ី បានលើកឡើងថា «នេះគឺជាឱកាសចុងក្រោយហើយ បងប្អូន។ ខ្ញុំមិនឲ្យឱកាសហ្នឹង របូសពីដៃខ្ញុំ ឲ្យប្រជារាស្ត្រវេទនា ឲ្យជាតិយើងរលាយទេបងប្អូន។ ឱកាសហ្នឹង គឺទៅដណ្តើមប្រទេសកម្ពុជា មកវិញ ឲ្យទាល់តែបាន»។
សមត្ថកិច្ចរាជរដ្ឋាភិបាលកម្ពុជា ក៏បានបញ្ជាក់ម្តងហើយម្តងទៀតដែរថា បើទណ្ឌិត សម រង្ស៊ី ហ៊ានមកដល់កម្ពុជាមែន ទោះជាតាមផ្លូវណា ថ្ងៃណា ក៏ត្រូវតែចាប់ញាត់គុក ១០០ភាគរយតែម្តង។ តាមអំណាចសាលដីកាចាប់ខ្លួន ខណៈដែលសម រង្ស៊ី ហ៊ុំព័ទ្ធដោយសំណុំរឿងជាច្រើន ដែលអាចនឹងឲ្យទណ្ឌិត សម រង្ស៊ី ជាប់គុកអស់មួយជីវិត៕
អត្ថបទ៖ សុខ លាភ
