រថយន្តធុនធំ ពន្លះជាមួយរថយន្តឡិចស៊ីស៤៧០ ធ្លាក់ចូលក្នុងព្រៃ របួសធ្ងន់ស្រាល៤នាក់

បាត់ដំបង៖ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តធុនធំមួយគ្រឿង បានបុកជាមួយរថយន្តឡិចស៊ីស ៤៧០ ពេញទំហឹង បណ្តាលឲ្យធ្លាក់ចូលស្នាមភ្លោះខាងកើតផ្លូវ និងបណ្តាលឲ្យមនុស្ស៤នាក់ រងរបួសធ្ងន់ស្រាល ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះកើតឡើងកាលពីវេលាម៉ោង៦ព្រឹកថ្ងៃទី២៧ ខែសីហា ឆ្នាំ២០១៩ នៅចំណុចផ្លូវជាតិលេខ៥ ភូមិអូរគ្រៀត ឃុំគារ ស្រុកមោងឫស្សី ខេត្តបាត់ដំបង។

តាមប្រភពព័ត៌មានបានឲ្យដឹងថា ករណីនេះ កើតឡើងរវាងរថយន្តបង្កម៉ាកអ៉ីស៊ុយស៊ុយ ធុនដឹកជញ្ជូនធំ ពាក់ស្លាកលេខ ព្រះសីហនុ 3A-2042 សណ្ដោងស៊ឺមីរ៉ឺម៉ក ពាក់ស្លាកលេខ ព្រះសីហនុ 4A-3779 បើកបរមកពីភ្នំពេញទៅបាត់ដំបង ដល់ចំណុចកើតហេតុក៏បានបុកជាមួយរថយន្ត១គ្រឿងម៉ាកឡិចស៊ីស៤៧០ ពាក់ស្លាកលេខ ភ្នំពេញ 2P-1256 អ្នកបើកបរឈ្មោះ រើន សារ៉ន ភេទប្រុស អាយុ៣១ឆ្នាំ រស់នៅភូមិច្រាបវាល ឃុំអន្លង់វិល ស្រុកសង្កែ ខេត្តបាត់ដំបង ដែលបើកបញ្ច្រាសទិសគ្នា បណ្ដាលឲ្យធ្លាក់ចូលស្នាមភ្លោះខាងកើតផ្លូវ និងមនុស្សរងរបួសធ្ងន់ស្រាល ៤នាក់។

ក្រោយកើតហេតុ សមត្ថកិច្ចបានចុះមកធ្វើការវាស់វែងយកវត្ថុតាង ទៅរក្សាទុកនៅអធិការដ្ឋាននរគបាល ដើម្បីកសាងសំណុំរឿងដោះស្រាយតាមនីតិវិធីច្បាប់៕