ឲ្យតែប្រកាសលទ្ធផល ដឹងតែយំ!!ហើយបេក្ខជន X Factor ចាន់ សុបញ្ញា សន្យាថាឈប់សម្រក់ទឹកភ្នែក មុខមហាជនទៀតហើយ (មានវីដេអូ)

ភ្នំពេញ៖ ប្រិយមិត្តដែលតាមដានកម្មវិធី X Factor Cambodia រដូវកាលទី១ ច្បាស់ជាស្គាល់ហើយ នូវក្មេងប្រុសអាយុ១៤ឆ្នាំ ឈ្មោះថា ​ចាប់ សុបញ្ញា មកពីខេត្តកំពង់ចាម។

យ៉ាងណាមិញ មហាជនក៏ដូចជាអ្នកគាំទ្រតែងតែសង្កេតឃើញថា ក្មេងប្រុសម្នាក់នេះ គ្រប់វគ្គដែលប្អូនឡើងប្រឡង ប្អូនតែងតែសម្រក់ទឹកភ្នែកជានិច្ច ហើយសូម្បីតែកាលពីយប់មិញ ក្នុងវគ្គ Six Chairs Challenge ក៏បេក្ខភាពរូបនេះ នៅតែសម្រក់ទឹកភ្នែកដាក់មហាជន ក៏ដូចជាគណកម្មការ ពេលដែលប្រកាសលទ្ធផលផងដែរ។

ក៏ប៉ុន្តែក្រោយពីបញ្ចប់ការប្រកួតយប់មិញភ្លាម ស្រាប់តែមហាជនមានការភ្ញាក់ផ្អើលមែនទែន ក្រោយពីឃើញបេក្ខភាពរូបនេះ បង្ហោះសារយ៉ាងច្រើននៅលើផេកហ្វេសប៊ុករបស់ខ្លួនទាំងយប់ ដោយសរសេរបែបនេះថា៖

“អរគុណច្រើនចំពោះការគាំទ្រ​ ហើយខ្ញុំក៏សុំទោសដែលខ្ញុំទប់អារម្មណ៍មួយនេះមិនបាន​ ធ្វើឲ្យខ្ញុំស្រក់ទឹកភ្នែករហូត ប៉ុន្ដែខ្ញុំប្រឹងទប់ខ្លាំងណាស់ នៅតែទប់មិនជាប់។ ខ្ញុំចាន់​ សុបញ្ញា សូមសន្យាថា​ ការប្រឡងប្រជែងវគ្គក្រោយខ្ញុំឈប់ស្រក់ទឹកភ្នែក​ទៀតហើយ ខ្ញុំនឹងធ្វើឲ្យបានល្អជាងនេះ​ ដើម្បីកុំឲ្យបងប្អូន អស់សង្ឃឹមមកលើរូបខ្ញុំបាទ”។