អតីតភរិយាម្ចាស់ផលិតកម្ម LD បើកចំហចំណងស្នេហ៍ជាមួយ អែតវីន ក្រោយលែងលះស្វាមីដាច់ស្រេច!
ភ្នំពេញ
៖ ជាការពិតណាស់ ក្រោយពីត្រូវបានទស្សនិកជនមានមន្ទិលសង្ស័យថា អតីតភរិយាម្ចាស់ផលិតកម្ម LD អ្នកនាង សុទ្ធ បញ្ចកា កំពុងតែមានចំណងស្នេហ៍លួចលាក់ ជាមួយនឹងតារាសម្ដែងប្រុសសង្ហាលោក អែតវីន រួចមក ជារឿយៗគេតែងសង្កេតឃើញអ្នកមេម៉ាយ កូនពីររូបនេះ បញ្ចេញនូវរូបភាពស្និទ្ធស្នាលដូចជាគូស្នេហ៍ថ្មីថ្មោង ជាមួយ អែតវីន ជាបន្តបន្ទាប់ ជាពិសេសពេលចូលរួមក្នុងកម្មវិធីមិត្ត ឬដើរលេងជាមួយគ្នាជាដើម។ ស្រាប់តែថ្មីៗនេះអ្នកនាង សុទ្ធ បញ្ចកា ទម្លាយគ្មានសល់ថា ពិតជាមានទំនាក់ទំនងស្នេហាស៊ីជម្រៅ លើសពីមិត្តជាមួយនឹងលោក អែតវីន មែន បន្ទាប់ពីនាង និងអតីតស្វាមី គឺលោក លៀក លីដា បានធ្វើការលែងលះគ្នាដាច់ស្រេច។
ឆ្លើយឆ្លងតាមរយៈសារអេឡិចត្រូនិច អ្នកនាង សុទ្ធ បញ្ចកា បានថ្លែងថា «នាងនិងលោក អែតវីន គឺពិតជាបានស្រឡាញ់គ្នាដោយចិត្ត និងចិត្ត ពិតប្រាកដមែន ដែលវាកើតចេញពីបេះដូង និងអារម្មណ៍ស្រឡាញ់គ្នាខ្លាំងឡើង ពីមួយថ្ងៃទៅមួយថ្ងៃ គ្មានអ្នកណាបង្ខំអ្នកណាឡើយ»។
អ្នកមេម៉ាយកូនពីរ ចាយរាង និងមានសាច់សខ្ចីមិនចាញ់ក្រមុំ សុទ្ធ បញ្ចកា បានបន្តថា «ចំណងស្នេហ៍រវាងនាង និងកម្លោះសង្ហា អែតវីន គឺចាប់ផ្ដើមមានទំនាក់ទំនងស្នេហាចាប់តាំងពីខែកុម្ភៈ ឆ្នាំ២០១៩មក និយាយឲ្យខ្លីទៅ គឺតាំងពីពេលដែលនាង ធ្វើការលែងលះគ្នាដាច់ស្រឡះ ជាមួយនឹងអតីតស្វាមី គឺលោក លៀក លីដា។ នាងសង្កត់ធ្ងន់ថា ស្នេហាដែលលោក អែតវីន មានឲ្យនាង គឺលោកមិនប្រកាន់ថា នាងជាស្រីមេម៉ាយ និងមានកូនរួចនោះទេ គឺកម្លោះសង្ហាសម្ដីផ្អែមរូបនេះ តែងតែតាមយកចិត្តយកថ្លើមនាង និងយកចិត្តទុកដាក់ ព្រួយបារម្ភពីនាងគ្រប់ពេល ដែលទង្វើទាំងអស់នេះ ធ្វើឲ្យនាងពិតជាស្រឡាញ់ និងធ្វើឲ្យអារម្មណ៍កក់ក្ដៅ មានលោកអែតវីនជាគូស្នេហ៍ ខុសពីអតីតស្វាមីរបស់នាង»។
អ្នកនាង សុទ្ធ បញ្ចកា បន្ថែមថា «នាងនិងអែតវីន មិនទាន់មានគម្រោងភ្ជាប់ពាក្យ ឬក៏រៀកការនៅឡើយទេ ដោយនាងសុំនៅមើលចិត្តថ្លើម និងស្វែងយល់ពីគ្នាឲ្យច្រើន និងស៊ីជម្រៅជាងនេះបន្តិចសិន មុននឹងសម្រេចចិត្តរៀបការ ព្រោះថាអ្នកទាំងពីរក៏ទើបតែចាប់ផ្ដើមសាងស្នេហ៍ជាមួយគ្នា ក្នុងកំឡុងដើមឆ្នាំ២០១៩នេះទេ គឺនៅមានពេលវេលាច្រើនទៀត ដើម្បីសិក្សាពីគ្នាទៅវិញទៅមក»។
យ៉ាងណាមិញ ក្រោយពីដឹងដំណឹងនេះ មាននារីមិនតិចអ្នកនោះទេ ដែលខកចិត្ត និងច្រណែន អ្នកមេម៉ាយរូបស្រស់ សុទ្ធ បញ្ចកា ដែលបានអែតវីន មើលថែបានយ៉ាងកក់ក្ដៅ។ យ៉ាងណាក៏ទស្សនិកជន ក៏ជូនពរឲ្យគូស្នេហ៍មួយគូនេះ ស្រឡាញ់គ្នា និងមានដំណឹងរៀបការឆាប់ៗ៕
