អនុរដ្ឋលេខាធិការក្រសួងសាធារណការ ស្នើអោយកម្មវិធីល្បងប្រាជ្ញា កែតម្រូវរឿងផ្លូវគោកចែកចេញជា៣ប្រភេទ

លោក គង់ វិមាន អនុរដ្ឋលេខាធិការ និងជានាយខុទ្ទកាល័យក្រសួងសាធារណការ និងដឹកជញ្ចូន តាមរយៈទំព័រហ្វេសបុករបស់លោក បានធ្វើការបក ស្រាយ ផ្លូវគោកចែកចេញជា ២ប្រភេទ និងស្នើរសុំឲ្យមានកែតម្រូវ ដើម្បីកុំឲ្យមានការយល់ច្រលំ។

ការលើកឡើងបែបនេះ បន្ទាប់ពីអ្នកប្រើប្រាស់បណ្តាញសង្គមហ្វេសបុកជាច្រើនបានចូលទៅខមមិន កម្មវិធីល្បងប្រាជ្ញា Heaven or Hell Cambodia ក្រោយពីកម្មវិធីនេះល្បងប្រាជ្ញានេះ​បានដាក់សំណួរថា “យោងតាមសៀវភៅវិញ្ញាសារជ្រើសរើសសម្រាប់ថ្នាក់ទី៩ តើនៅប្រទេសកម្ពុជា គេចែកផ្លូវគោកជា​ប៉ុន្មាន​ប្រភេទ?” ។ ក្នុងនោះផងដែរ បេក្ខជនដែលចូលរួមលេង លោកកៅ សីហា​ បានជ្រើសរើសចម្លើយ​២ប្រភេទ​ គឺមានលូវថ្នល់ និងផ្នូវដែក ប៉ុន្តែចម្លើយនោះបែរជាមិនត្រឹមត្រូវនោះទេ ដោយចម្លើយ​ដែលត្រឹម​ត្រូវគឺមាន ៣ប្រភេទ គឺ ផ្លូវជាតិ ផ្លូវខេត្ត និង ផ្លូវរុក្ខបាល។

លោក គង់ វិមានថា ចូរស្វែងយល់ពីផ្លូវ(តាមច្បាប់) ដើម្បីជៀសវាងការបកស្រាយខុស ផ្លូវគោកចែក​ចេញ​ជា ២ប្រភេទគឺ៖១).ផ្លូវថ្នល់ និង ២).ផ្លូវដែក ផ្លូវថ្នល់ចែកចេញជា ៤ប្រភេទទៀតគឺ៖១). ផ្លូវជាតិ២). ផ្លូវ​ខេត្ត​៣). ផ្លូវលំ(ផ្លូវជនបទ) និង ៤). ផ្លូវរុក្ខបាល ចំណែកឯគមនាគមន៍គឺមាន៣ប្រភេទ គឺ៖១). ផ្លូវគោក២). ផ្លូវ​ទឹក និង៣). ផ្លូវអាកាស ។ អ្នកបកស្រាយខុស សូមកែតម្រូវផង ដើម្បីកុំអោយមានការយល់​ច្រឡំដល់​មហាជន៕

អត្ថបទ៖ សុខ លាភ