លោក ផៃ ស៊ីផាន ច្រានចោលការលើកឡើង ថា សម្តេចតេជោ មានបញ្ហាសុខភាព ទើបមិនចេញមុខក្នុងកម្មវិធីផ្សេងៗ
ភ្នំពេញ៖ ការមិនបើកកិច្ចប្រជុំពេញអង្គគណៈរដ្ឋមន្ត្រី នាថ្ងៃសុក្រ ទី២៦ ខែកក្កដា ឆ្នាំ២០១៩ ដោយសារតែរាជរដ្ឋាភិបាល មិនទាន់មានរបៀបវារៈណា ដែលត្រូវប្រជុំសម្រេចនៅឡើយនេះបើយោងតាមលោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាអ្នកនាំពាក្យរាជរដ្ឋាភិបាល ថ្លែងក្នុងសន្និសីទកាសែតប្រចាំសប្តាហ៍ នានាព្រឹកថ្ងៃទី២៥ ខែកក្កដា ឆ្នាំ២០១៩។
លោក ផៃ ស៊ីផាន បានប្រកាសថា សម្តេចតេជោ ហ៊ុន សែន មានសុខភាពល្អ ហើយសម្តេចបានបំពេញការងារជាធម្មតា រៀងរាល់ថ្ងៃ។
លោក ផៃ ស៊ីផាន ក៏បានច្រានចោលនូវការលើកឡើង និងការវិភាគនានា ដែលថា សម្តេចតេជោ ហ៊ុន សែន កំពុងមានបញ្ហាសុខភាព ទើបមិនចេញមុខក្នុងកម្មវិធីសាធារណៈនានា ក៏ដូចជា ការដឹកនាំកិច្ចប្រជុំគណៈរដ្ឋមន្ត្រី ជាដើម។ ប៉ុន្តែតាមពិត សម្តេចបានបំពេញការងាររៀងរាល់ថ្ងៃ ហើយលោកក៏ទើបតែជួបសម្តេច កាលពីថ្ងៃទី២៤ ខែកក្កដា ឆ្នាំ២០១៩។
សូមរម្លឹកថា បន្ទាប់ពីវិលត្រឡប់មកពីបំពេញបេសកកម្មការងារនៅទីក្រុងហ្សឺណែវ ប្រទេសស្វីស កាលពីដើមខែកក្កដា ឆ្នាំ២០១៩ សម្តេចតេជោ ហ៊ុន សែន បានឆ្លៀតជិះកង់ ហាត់ប្រាណ ក៏ដួលកង់ ហើយបណ្តាលឲ្យសម្តេច គ្រិកស្មា ដែលត្រូវអញ្ជើញទៅពិនិត្យព្យាបាល នៅមន្ទីរពេទ្យ ក្នុងប្រទេសសឹង្ហបុរី។
បន្ទាប់ពីវិលត្រឡប់មកពីប្រទេសសឹង្ហបុរី សម្តេចតេជោ ហ៊ុន សែន បានអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី១២ ខែកក្កដា ឆ្នាំ២០១៩៕
អត្ថបទ៖ សុខ លាភ
