Apple ចាយលុយ ១ ពាន់លានដុល្លារ ដើម្បីទិញយកអាជីវកម្មផលិតបន្ទះឈីប modem របស់ក្រុមហ៊ុន Intel
តាមរបាយការណ៍ពី Wall Street Journal បានចុះផ្សាយកាលពីថ្ងៃចន្ទកន្លងទៅបានឲ្យដឹងថាក្រុមហ៊ុន Apple កំពុងស្ថិតក្នុងការចរចាចង់ទិញយកអាជីវកម្មផលិតបន្ទះឈីប modem របស់ក្រុមហ៊ុន Intel ដែលមានតម្លៃប្រមាណ ១ ពាន់លានដុល្លារអាមេរិក។
កិច្ចព្រមព្រៀងអាចនឹងប្រកាសទៅបាននៅសប្តាហ៍ក្រោយ ស្របពេលដែលតម្លៃភាគហ៊ុនរបស់ Intel បានផ្ទុះឡើង ១ ភាគរយបន្ទាប់ពីលេចចេញដំណឹងដ៏ល្អមួយនេះ។ សព្វថ្ងៃ Intel ក៏ជាដៃគូសហការជាមួយ Apple លើការផ្គត់ផ្គង់បន្ទះឈីប modem LTE លើ iPhone ជំនាន់ក្រោយ ប៉ុន្តែក្រោយពី Apple និង Qualcomm ដោះស្រាយវិវាទប៉ាតង់ចប់រួចរាល់ ក៏ធ្វើឲ្យ Intel ហាក់បាក់ស្បាតនិងសម្រេចដកថយលើឧស្សាហកម្មនេះវិញ។
ប្រសិនណាក្លាយជាការពិត នោះក៏នឹងក្លាយជាការចំណាយដ៏ធំមួយផ្សេងទៀតរបស់ក្រុមហ៊ុនលោក Tim Cook ខណៈការចាយច្រើនបំផុតបានកើតឡើងនៅឆ្នាំ ២០១៤ គ្រាដែល Apple ជះ ២,៦ ពាន់លានដុល្លារទិញយកក្រុមហ៊ុន Beats Electronics and Beats Music៕
ប្រភព៖ CNBC
