លោក ជា សុផារ៉ា ៖ អភិបាលរាជធានីខេត្ត ត្រូវចាត់វិធានការលើក្រុមហ៊ុនសំណង់ដែលគ្មានច្បាប់អនុញ្ញាត
(ភ្នំពេញ)៖ យោងតាមលិខិតជូនដំណឹងរបស់លោកលោក ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ នាថ្ងៃទី២៣ ខែកក្កដា ឆ្នាំ២០១៩ នេះបានឲ្យដឹងថា ក្រសួងរៀបចំដែនដី នគរូបនីយកម្ម និងសំណង់ ស្នើឲ្យអភិបាលនៃគណៈអភិបាលរាជធានីខេត្ត ចាត់វិធានការតាមផ្លូវច្បាប់ចំពោះក្រុមហ៊ុនសាងសង់ដែលមិនមានវិញ្ញាបនបត្របញ្ជាក់ការអនុញ្ញាតឱ្យប្រកបអាជីវកម្មសាងសង់ចេញដោយក្រសួង និងចំពោះម្ចាស់សំណង់ដែលដំណើរការការដ្ឋានសាងសង់ ដោយមិនមានលិខិតអនុញ្ញាតចេញដោយអាជ្ញាធរមានសមត្ថកិច្ច។ 
ការជូនដំណឹងខាងលើនេះ ធ្វើឡើងដើម្បីធានាការងារសំណង់ និងការប្រើប្រាស់សំណង់ឱ្យបានត្រឹមត្រូវតាមបទដ្ឋានគតិយុត្ត និងបទដ្ឋានបច្ចេកទេសសំណង់ ធានាគុណភាព សុវត្ថិភាពសំណង់ ការពារទ្រព្យសម្បត្តិ សុខុមាលភាពរបស់ម្ចាស់សំណង់ ក៏ដូចជាអ្នកប្រើប្រាស់សំណង់និងសាធារណជន និងធានាគណនេយ្យភាព និងប្រសិទ្ធភាពក្នុងការប្រកបវិជ្ជាជីវៈ ក្នុងវិស័យសាងសង់៕
អត្ថបទ៖ ឆ្មាសរ
